SQO avtojolynda Túrkııa azamattary jolda qaldy
PETROPAVL. QazAqparat – Soltústik Qazaqstan oblysynyń polıtseıleri jolda qalǵan Túrkııa azamattaryna kómektesti, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, tártip saqshylary «Almaty-Ekaterınbýrg» tasjolynda Ǵ.Músirepov aýdanyndaǵy Toqsan bı aýylyna 5 shaqyrymdaı jerde Túrkııanyń eki azamatyna kómekke keldi. Jasymyq artqan eki júk kóliktiń biriniń jaǵarmaıy qatyp qalǵan.
Sheteldikterdiń jolda turǵanyn sol mańda júrgen patrýldik polıtsııaǵa ótip bara jatqan júrgizýshilerdiń biri habarlaǵan. Tártip saqshylary birden kómekke kelip, qajetti is-sharalardy qolǵa aldy. Júrgizýshiler jaqyn mańdaǵy dámhanalardyń birinde jylynǵansha, polıtseıler kólikterdi kúzetip, júrgizbek boldy. Alaıda, qatyp qalǵan mashına trassada ot almaı, ony Toqsan bı eldi mekenindegi boksqa súırep jetkizýge týra keldi.
«Júk kóligine jedel jóndeý jumystary júrgizildi. Sonyń ózine eki kún ýaqyt ketti. Jolda qalǵan júrgizýshilerge kómek kórsetý bizdiń jumystaǵy basym baǵyttardyń biri. Bul, ásirese yzǵarly klımatty Soltústik Qazaqstanda ózekti. DEÝ-66 basshysy Dmıtrıı Sablınge jáne jergilikti aýyl sharýashylyǵy kásiporyndaryndaǵy avtoparkterdiń biriniń meńgerýshisi Pavel Petýhovqa kólikterdi jóndeýge kómekteskenderi úshin alǵysymdy bildiremin. Qysyltaıań ýaqytta bizdiń azamattar qashan da qol ushyn berýge ázir», - dedi SQO PD Jergilikti polıtsııa qyzmeti basqarmasynyń PPB komapdıri Erlan Mádıev.
Polıtseıler Túrkııa azamattarynyń biriniń telefon nómirin alyp, olar Qostanaıǵa aman-esen jetkenshe habarlasyp otyrdy.
