SQO aýylynda úıirdegi jylqy tumaýmen aýyrdy – ákim

PETROPAVL. QazAqparat – Soltústik Qazaqstan oblysy Esil aýdanyndaǵy úıirdegi mal jylqy tumaýymen aýyrǵan bolyp shyqty. Bul týraly osy aýdannyń ákimi brıfıngte málim etti, dep habarlaıdy QazAqparat tilshisi.

Óńirlik kommýnıkatsııalar qyzmetinde ótken brıfıngte SQO Esil aýdanynyń ákimi Medet Ospanov atqarylǵan jumystardy qorytyndylap, tilshilerdiń suraqtaryna jaýap berdi.

Jýrnalıster osy aýdannyń Chırıkovka eldi mekeninde úıirde aýyrǵan jylqylardyń jaıyn surady.

«Eki apta buryn bir jylqy ólgen. Ol jaıynda bizge habarlamaǵan. Jylqyshylar ıesin habardar etip, eki jaq ózara kelisken. Onyń neden ólgeni belgisiz, biz óleksesin kórgen joqpyz. Jylqy aýyryp jatyr degen habar jetisimen oqıǵa ornyna bardyq, veterınarlar maldan saraptama alyp, Nur-Sultan qalasyna veterınarııanyń ulttyq referent ortalyǵyna jiberdi. Mal jylqy tumaýymen aýyryp jatyr», - deıdi Medet Ospanov.

Chırıkovka eldi mekeni mańynda baǵylyp júrgen úıirde 380 jylqy bar.

Aýdan ákiminiń aıtýynsha, bári birdeı aýyryp jatqan joq, arasynda on shaqtysy ǵana jótelip, tanaýynan sý aqqan.

«Biz jylqy ıelerin jınap, sóılestik. Turǵyndar óz qarajatyna antıbıotık aldy. Úıir basynda beket quryp, veterınarlar malǵa ekpe jasady. Basqa okrýgterge, aýyldarǵa habarlastyq, olarda aýrý tirkelgen joq», - deıdi aýdan ákimi.