SQO aýylynda kásipker men jergilikti ákimdik jerge talasyp jatyr

PETROPAVL. QazAqparat – Soltústik Qazaqstan oblysy Esil aýdany ákimdigi sharýa qojalyǵynan 290 ga jaıylymdyq jerdi alyp qoımaq. Mamandardyń aıtýynsha, jergilikti bıliktiń bul áreketi – zańǵa qaıshy, dep habarlaıdy QazAqparat tilshisi.

SQO Kásipkerler palatasy baspasóz qyzmetiniń málimetinshe, Esil aýdanynyń turǵyny, «Arystan» sharýa qojalyǵynyń jetekshisi Qalamqas Dáýletova óńirlik kásipkerler palatasyna shaǵymdanǵan.

Otbasy ońtústikten qonys aýdarǵan.

2019 jyly olar aýyl sharýashylyǵymen aınalysý úshin jer ýchaskesin aýktsıon arqyly jalǵa alady, al byltyr jergilikti ákimdik 290 ga qaıtaryp alýǵa sheshim shyǵarǵan.

Bul másele kásipkerlerdiń quqyǵyn qorǵaý jáne sybaılas jemqorlyqqa qarsy is-qımyl jónindegi keńestiń otyrysynda talqylandy.

«Ótken jyldyń 20 jeltoqsanynda Esil aýdany ákimdiginiń №319 qaýlysymen Petrovka aýyly turǵyndarynyń maly jaıylýy úshin «Arystan» sharýa qojalyǵynyń jerin májbúrli túrde qaıtarý jumysy bastaldy. QR Jer kodeksiniń 84-babyna sáıkes jer ýchaskesi memlekettik qajetter úshin satyp alý nemese jekemenshik ıesiniń kelisimimen teń qundy basqa jer ýchaskesin berý arqyly alynady. Sondaı-aq sot sheshimi boıynsha májbúrli túrde ıelikten shyǵarylýy múmkin», - deıdi SQO kásipkerler palatasy kásipkerlerdiń quqyǵyn qorǵaý bóliminiń bastyǵy Aıdos Keńbeıilov.

Aýyl turǵyndarynyń qajettiligin óteý úshin bul ýchaske Esil aýdanynyń jaıylymdardy basqarý jáne paıdalaný josparyna engizilýi kerek, sonymen qatar jeke qosymshada jaıylymdardyń barlyq shekaralary men aýdany kartada kórsetilýi tıis.

Biraq josparǵa ol engizilmegen.

«Bir jarym jyl buryn biz «Eńbek» baǵdarlamasymen ońtústikten soltústikke kóshtik. Bul jer ýchaskesin aýktsıonnan 6 jylǵa jalǵa aldyq, al tehnıka men mal nesıege alyndy. Sharýa qojalyǵy 5 adamdy turaqty jumysqa qamtyp otyr, olardyń ortasha jalaqysy - 170 myń teńge. Biz barlyq mindettemelerdi oryndap kelemiz. Aýyl turǵyndaryna arzan baǵamen shóp beremiz. Biz sıyr etin satýdy josparlap otyrmyz, biraq bizge jumys isteýge múmkindik bermeı jatyr», - deıdi «Arystan» ShQ ókili Azamat Ábdirahmanov.

Esil aýdandyq jer qatynastary bóliminiń basshysy Evgenıı Gýbanyń aıtýynsha, byltyr mamyr aıynda Petrovka aýyly turǵyndarynyń biri aýdan ákimine mal jaıýǵa arnalǵan jaıylymdyq jerlerdiń joqtyǵyn aıtqan.

«Biz okrýgtegi jaıylymdyq jerlerdi kórsettik. Aryzdanǵan adam kelisti. Biraq jyldyń sońyna qaraı turǵyndar búlik shyǵaryp, oblys prokýratýrasyna aryzdandy. Aýyldyq okrýg ákimi turǵyndardyń jıynyn ótkizip, onda osy ýchaskeni alyp qoıý týraly sheshim qabyldandy, tıisti qyzmettik jazba aýdan ákimine jiberildi. Budan ári oblys ákimdigi ázirlegen Jol kartasy negizinde biz jer ýchaskesin májbúrlep alyp qoıý rásimin bastadyq. Osydan keıin kásipker prokýratýraǵa bizdiń ústimizden aryzdandy. Alyp qoıý rásimi 2023 jylǵy 10 maýsymda bastalady, ıaǵnı, bizge osy ýchaskeni jaıylym jerler josparyna engizýge ýaqyt bar. Aýdan ákimdigi kásipkerge balamaly ýchaske bere almaıdy, biraq ótemaqyny óteýge daıyn», - deıdi Evgenıı Gýba.

Otyrysqa qatysqan oblystyq jer ınspektsııasynyń ókilderi óz kezeginde atalǵan fakti boıynsha sharýa qojalyǵynyń jer ýchaskesin májbúrlep alyp qoıý týraly qaýlynyń kúshin joıý jóninde aýdan ákimdiginiń atyna uıǵarym berilgenin atap ótti.

Al Esil aýdanynyń ákimdigi bul uıǵarymǵa sot tártibimen shaǵymdanýǵa nıetti.

Jıyn sońynda aýdan ákimdigine jerdi májbúrlep alyp qoıý týraly zańsyz qaýlynyń kúshin joıýdy jáne zańnamaǵa sáıkes áreket etýdi usyný týraly sheshim qabyldandy.

Sondaı-aq, keńes músheleri kináli laýazymdy tulǵalardy jer zańnamasyn buzǵany úshin tártiptik jaýapkershilikke tartýdy usyndy.