SQO aýylynda ata-analar ótinishimen jańa mektep salyndy
PETROPAVL. QazAqparat – Soltústik Qazaqstan oblysy Beskól aýylynda 300 orynǵa shaqtalǵan jańa mektep paıdalanýǵa berildi, dep habarlaıdy QazAqparat tilshisi.
Bul jaıynda óńir basshysy Qumar Aqsaqalov áleýmettik jelidegi óz paraqshasynda jazdy.
Oblys ortalyǵyna tıip turǵan Beskól aýylynda qurylys qarqyn alyp, turǵyndar sany jyldan jylǵa artyp keledi. Eldi mekenniń ońtústik-shyǵys bóliginde ǵana qazir 3,5 myń adam turady.
«Mektep bolmaǵasyn balalar aýdan ortalyǵyndaǵy 3 bilim ordasynda oqyp júrdi. Oǵan barý úshin respýblıkalyq joldy kesip ótý qajet. Bul jerde balalardyń qaýipsizdigi máselesi turdy. Bastaýysh synyptardyń balalary avtobýspen tasymaldandy.⠀
Eki jyl buryn eseptik kezdesýde ata-analar osy máseleni kótergen edi. Búgin mine, ol sheshimin tapty. Jańa ári zamanaýı mektep balalarǵa aıaq attam jerde ornalasqan», - dep jazdy oblys ákimi.
Bul – bıyl salynǵan osymen úshinshi mektep. Jańa oqý jyly qarsańynda Petropavldaǵy Bereke yqshamaýdanynda taǵy bir bilim ordasy paıdalanýǵa berildi. Úshinshisi oblys ortalyǵyndaǵy Ýálıhanov kóshesinde turǵyzylyp jatyr.
