SQO aýylynda 240 mln teńgege sport kesheni salyndy
Nysandy ashý saltanatyna oblys ákimi Erik Sultanov qatysty, dep habarlaıdy QazAqparat SQO ákimdiginiń baspasóz qyzmetine silteme jasap.
Sport kesheni «Zenchenko ı K» kommandıttik seriktestiginiń jeke qarajatyna salyndy. Qurylys pen jabdyqtardyń quny 240 mln. teńge. Keshende voleıbol men basketbolǵa arnalǵan alań, jattyǵý zaly, ádisteme, medıtsınalyq kabınet sondaı-aq, kıim aýystyratyn bólme, dýsh, bılıard zaly ornalasqan. Sonymen qatar, nysanda 25 metrlik 4 jolaqty basseın bar.
«Sońǵy eki jyl ishinde biz 192 hokkeı alańshasyn, 255 fýtbol alańyn saldyq. Búgin biz Novonıkolskoe aýylynyń «Zenchenko ı K» KS sharýashylyǵynda sporttyq ortalyqty ashyp otyrmyz. Bul marqum Gennadıı Ivanovıchtiń oıy boldy, ony júzege asyrǵan onyń uly - Gennadıı Gennadevıch Zenchenko», - dedi Erik Sultanov.
Sondaı-aq, jumys sapary barysynda oblys ákimi jańa mal sharýashylyǵy keshenine bardy. Munda belarýstik «Invet» AAQ kompanııasynyń jabdyqtary ornatylǵan. «Zenchenko ı K» kommandıttik seriktestiginiń dırektory Gennadıı Zenchenkonyń aıtýynsha, jańa nysandardy salý mal basyn kóbeıtýge jáne saýyn kólemin arttyrýǵa múmkindik beredi.
«Biz naryqty sútpen qamtamamyz etýge tyrysamyz, qazirgi kezde shıkizat jetispeýshiligi bar. Suranys artyp jatyr. Biz Petropavlǵa jiberip júrgen ónim kólemi sol qalpy, Astana qalasyna jibergen ónim kólemi de sol baıaǵydaı, Qorǵanǵa da burynǵydaı jiberip júrmiz. Alaıda 18 tonna Astana qalasyna, 12 tonna Petropavl qalasyna, 6 tonna Qorǵan qalasyna jetpeıdi. Biz tek ózimizdiń shıkizatpen jumys isteımiz. Al shıkizat bolý úshin, mal sharýashylyǵyn damytý qajet. Bıdaı maýsymdyq sharýashylyq, al mal sharýashylyǵymen qysy-jazy aınalysýǵa bolady», - dedi BAQ-qa bergen suhbatynda Gennadıı Zenchenko.
