SQO aýyldaryndaǵy úılerge aýyzsý tartyldy

NUR-SULTAN. QazAqparat - Soltústik Qazaqstan oblysyndaǵy 20 myń úıge aýyz sý tartyldy. Bul týraly Ortalyq kommýnıkatsııalar qyzmetinde ótken brıfıngte aıtyldy.

«Búgingi tańda oblysymyzdaǵy 58 myń adam turatyn 20 myń úıge aýyzsý tartyldy. Bul- barlyq úıdiń 26%. Eger aýyl shetinde sý shyǵatyn munara tursa - statıstıka boıynsha ol jerde sý bar bolyp sanalady. Men úshin bul jetkiliksiz. Aýyz sý úı ishinde bolýy kerek», - deıdi SQO ákimi Qumar Aqsaqalov.

Sondaı-aq, ol bıyl 26 myń turǵyny bar 41 aýylda 177 shaqyrymdyq taratýshy torapty qalypqa keltirý jumystary júrgizilip jatqanyn aıtty.

«1668 úı torapqa qosyla alady. Olardyń 491-i úıge sý tartyp aldy», - deıdi ol.

Jalpy, oblysta sýmen jabdyqtaýǵa bólingen qarajat 4,4 mlrd teńgege ósken.

«Kelesi jyly qosymsha 6,1 mlrd teńge bólinip, 3,6 myń úıde aýyzsýǵa qosylý múmkindigi bolady», - deıdi oblys ákimi.