SQO aýyldaryndaǵy kópqabatty úıler ortalyq jylý júıesine qosylyp jatyr

PETROPAVL. QazAqparat – Soltústik Qazaqstan oblysynda bıyl aýyldardaǵy 57 kóp qabatty úı ortalyqtandyrylǵan jylytý júıesine qosyldy, dep habarlaıdy QazAqparat tilshisi.

SQO ákimi Qumar Aqsaqalov Qyzyljar aýdanynda bolyp, sapary barysynda aýdan ortalyǵy – Bekól aýylyndaǵy kóp qabatty úılerdi jylýǵa qosý boıynsha jóndeý jumystarynyń qorytyndysyn shyǵardy. Óńir basshysy Olga Sklıarovanyń páterine bardy. Bul týraly Qumar Aqsaqalov áleýmettik jelidegi paraqshasynda jazdy.

«Olga Valentınovna Beskól aýylyndaǵy kóp qabatty úıde turady. Ol qysqa taman otyn, kómir satyp alyp, pesh jaǵatyn. Endi bul kelmeske ketti. Byltyr kóp qabatty úı ortalyq jylý júıesine qosyldy. Bul otbasynyń bıýdjetine aıtarlyqtaı únem ákeldi, páter jyly ári taza», - dep jazdy SQO ákimi.

Beskóldegi ortalyq qazandyq jańartylyp, jylý qubyrlary jóndeldi. Osylaısha turǵyndarynyń kópshiligi turmystyq jaǵdaılaryn jaqsartty. Buryn úsh bólmeli páterdi jylytý úshin olar bir qysta otyn-kómirge 120 myń teńge jumsaıtyn. Al ortalyqtandyrylǵan jylytý júıesine qosylýdyń nátıjesinde endi 7 aıǵa 60 myń teńge tólemek.

2 jyl ishinde mundaǵy 85 kóp qabatty úıdiń 56-sy ortalyqtandyrylǵan jylýǵa qosyldy. Qalǵanyny kelesi jyly tartylady. Sonymen qatar 20 áleýmettik nysan, 20 jeke úı jáne 4 dúken jylý júıesine qosyldy. Qazir aýdan ortalyǵynda 800 abonent bar.

Ekinshi jylý jelisi Ońtústik-Shyǵys yqsham aýdanynda salynyp, 100 jeke úı men mektepti jylýmen qamtamasyz etedi.

«Ótken jyldyń sońynda biz aýdan ortalyqtaryndaǵy 53 kópqabatty úıdi jylýǵa qosýdy josparladyq. Іs júzinde Beskól, Sergeevka jáne ıAvlenkada 57 kóp qabatty úı qosyldy. Al bul úılerde 2,1 myń aýyl turǵyny turyp jatyr, olar atqarylǵan jumystyń nátıjesin baǵalap úlgerdi», - dedi Qumar Aqsaqalov.

Sondaı-aq, aımaq basshysy keler jyly aýdandardaǵy kóp qabatty úılerdi jylýǵa qosý jumystary jalǵasatynyn atap ótti.