SQO aýyldarynda 95 mektep kúrdeli jóndeýden ótti
PETROPAVL. QazAqparat – Soltústik Qazaqstan oblysynda bıyl 5 mlrd teńgege 125 bilim ordasy kúrdeli jóndeýden ótse, keler jyly osy maqsatqa taǵy 3 mlrd teńge bólinetin boldy, dep habarlaıdy QazAqparat.
Bıyl jóndeýden ótken 125 bilim nysanynyń 95-i aýyldarda ornalasqan. Nátıjesinde 35 myń bala nemese óńirdegi oqýshylardyń jartysynan astamy jańartylǵan mektepte bilim alyp jatyr.
«Keler jyly bul jumystar jalǵasýy kerek. Bilim mekemeleriniń jaǵdaıyn jaqsartýǵa 3 mlrd teńge bólýdi josparladyq. Degenmen, jumystyń sapasyn únemi nazarda ustap, qadaǵalap otyrý qajet», - dedi oblys ákimdiginiń otyrysynda aımaq basshysy Qumar Aqsaqalov.
Bilim berý salasyn damytý SQO-nyń úsh jylǵa arnalǵan keshendi baǵdarlamasyna engen. Osy joba aıasynda óńirdegi kóptegen másele sheshilmek. Máselen, Petropavl qalasynda úsh aýysymdy bilim berýden arylý maqsatynda 900 oryndyq mekteptiń qurylysy júrip jatyr. Ol 2021 jyly qoldanysqa engiziledi dep josparlanǵan.
63 mektepti 4 myń kompıýtermen qamtý maqsatynda bıyl 563 mln teńge bólinýi qajet edi. Alaıda, QR Bilim jáne ǵylym mınıstrligi tarapynan áli kúnge bıýdjettik ótinim qoldaý tapqan joq. Bilim basqarmasy mamandarynyń málimetinshe, oblys mektepterindegi kompıýterlerdiń jartysyna jýyǵyn aýystyrý kerek. Bıyl 4 aýdan 135 tehnıka alýǵa shamamen 25 mln teńge bólgen. Biraq ol - jetkiliksiz.
«Máńgilik el jastary – ındýstrııaǵa» - «Serpin» baǵdarlamasy boıynsha oblysqa jastardy tartý baǵdarlamasy júzege asyp jatyr. Sońǵy úsh jylda joǵary bilimdi jastardy oqytýǵa memlekettiń tapsyrysy 233 ten 376-ǵa deıin, 61,4% artty.
Sondaı-aq bıyl óńirde mektep muǵalimderine degen qajettilik tolyǵymen jabyldy. Tek aǵymdaǵy jyly oblysqa 676 ustaz jumys isteýge kelgen. Bul – ótken jylmen salystyrǵanda eki ese kóp.
