SQO aýyldarynda 700 úı salý josparlanyp otyr
PETROPAVL. QazAqparat – Soltústik Qazaqstan oblysynyń ákimi Qumar Aqsaqalovtyń aıtýynsha, aımaqta qurylys aýqymy tómen, al múmkindigimiz kóp, dep habarlaıdy QazAqparat tilshisi.
2019 jyly oblysta 2240 páter paıdalanýǵa berildi. Ol 2018 jylmen salystyrǵanda 172 páterge kóp. Soǵan qaramastan, turǵyn úı qurylysynyń qarqyny oblys ákiminiń kóńilinen shyqpady.
Aımaq basshysy oblys jyl saıyn keminde 3 myń páter soǵýy kerek dep esepteıdi.
«Kóp ýaqyttan beri oblys jáne qala turǵyndaryn qanaǵattandyratyndaı qarqynmen úı salynbady. Qazir páter sany men soǵan sáıkes sharshy metrlerdi de kóbeıtý úshin qosymsha múmkindikter qarastyrylyp jatyr. Ol úshin aýqymdy jeke sektorlar alynyp tastalady. Biz sol jerdegi adamdarǵa da kómek berip, turǵyn úı salyp ta úlgeremiz. Keminde 3 myń páter salyp, jylyna shamamen 400 myń sharshy metr turǵyn úı tapsyrýymyz kerek», - dedi oblys ákimi.
Aımaq basshysy aýyldyq aımaqtardaǵy qurylysty qolǵa almaq. Ótken jyly aýyldarda 428 úı salyndy. Qumar Aqsaqalovtyń aıtýynsha, 2020 jyly taǵy 700 úı salý josparlanǵan.
Ótken jyldyń sońynda bolǵan jınalystardyń birinde oblys ákimi jaýapty basqarmalar men qurylys kompanııalaryna aldyn-ala daıyndalý kerektigin eskertken. Bul qurylys alańdary men maman daıarlaýǵa da qatysty. Sońǵysy – aımaq úshin ózekti másele. Jumysshylardyń jetispeýshiligi týraly birneshe ret aıtylǵan. Q.Aqsaqalov qurylys kompanııalary kolledjderdi basshylyqqa alyp, ózderine maman daıarlaýy kerek dep esepteıdi.
Qurylysqa jaýapty adamdardyń máseleni sheshýge ýaqyty tyǵyz. Aımaqtaǵy turǵyn úı qurylysy maqsatyna jete me, ony 2020 jyldyń sońynda baıqaımyz.
