SQO aýyldarynda 100 mektep jóndeledi
PETROPAVL. QazAqparat – Soltústik Qazaqstan oblysyndaǵy 635 eldi mekenniń 187-sinde bilim, densaýlyq saqtaý, mádenıet, sport nysandary jóndelip, aýyldarda sý jáne jol máselesi sheshiledi, dep habarlaıdy QazAqparat tilshisi.
Búgin SQO ákimi Qumar Aqsaqalov onlaın rejımde ákimdik otyrysyn ótkizip, birinshi toqsandaǵy óńirdiń áleýmettik-ekonomıkalyq damýynyń qorytyndysyn shyǵardy. Karantın jaǵdaıynda jumys isteý qıyn bolǵanymen, barlyq negizgi salalarda ósim bar. Eń bastysy, jospar bekitilip, oblys bıýdjeti 262 mlrd teńgeden 298 mlrd teńgege deıin ulǵaıtyldy.
«Aýyl sharýashylyǵynda, ónerkásipte oń ósim bar. Óńirge tartylǵan ınvestıtsııa 21,1 % artty. Qurylys salasy 7,4 % ósti. Aldaǵy birer aptada jóndeý jumystary bastalady. Bıyl da áleýmettik mańyzy bar nysandardyń 377-sin jónge keltiremiz. Osy maqsatqa 32 mlrd teńge bólindi. Nátıjesinde bul jumystarǵa 6,5 myń jumysyz júrgen adam tartylady», - dedi Qumar Aqsaqalov.
Oblystaǵy 635 eldi mekenniń shamamen ár úshinshisin oń ózgerister kútip tur. Aýyldardaǵy 100 mektep jóndeýden ótedi. Jańadan salynǵan Bereke yqsham aýdanyndaǵy 250 oryndyq emhananyń da qurylysy bıyl aıaqtalmaq. Budan basqa 23 emdeý mekemesi, 24 mádenıet nysany jónge keltiriledi. Al Saýmalkól, ıAvlenka, Smırnov, Taıynsha, Sergeev jáne Presnovkada dene shynyqtyrý-saýyqtyrý ortalyqtary boı kótermek.
Joldardy jóndeýge 39 mlrd teńge bólingen. Qarajattyń bir bóligine 74 aýyldyń ishine joldar da salynady. Al 76 eldi mekendi sýmen qamtý jaqsartylady.
Qurylys jumystary oblys ortalyǵynda da qyzbaq.
«Kópqabatty 9 baspananyń qurylysy bastalady. Jalpy 270 myń sharshy metr turǵyn úı paıdalanýǵa berilmekshi. Bıyl jalǵa beriletin 8 jáne jeke kompanııalar salǵan 11 úı qoldanysqa engiziledi. Atqarylatyn jumys kóp. Josparlanǵan jumystar sapaly atqarylýy úshin qoǵamdyq baqylaý bolýy kerek. Byltyr bul platformalar jetkilikti deńgeıde jumys istegen joq. Qoǵamdyq uıymdar, «Nur Otan» partııasy baqylaýdy kúsheıtýi kerek», - dedi óńir basshysy.
