SQO: Aýyl sharýashylyǵyndaǵy ósim 102,3 % qurady
ASTANA. QazAqparat - Soltústik Qazaqstan oblysynyń ákimdiginde óńirdiń 2017 jylǵy áleýmettik-ekonomıkalyq damý qorytyndylary shyǵaryldy, dep habarlaıdy QazAqparat óńir basshylyǵynyń baspasóz qyzmetine silteme jasap.
«Barlyq baǵyttar boıynsha bizde oń ózgerister baıqalady. Degenmen, biz kórsetkishterdi respýblıkalyq deńgeımen salystyrýymyz qajet. Damý yrǵaǵy óte mańyzdy», - dedi oblys ákimi Qumar Aqsaqalov.
Mysaly, ónerkásip boıynsha respýblıkalyq ósim 107,1% bolsa, oblystyq 104,5% qurady. Mashına jasaý salasynda óndiris kólemi 1,5 esege ósip, 42 mıllıard teńgeni qurady.
Indýstrııalandyrý kartasyna búkil aýdandar óz úlesterin qosý qajet. Aımaq basshysy bul aýqymdy jumys ekenin aıtyp, ásirese ınvestorlardy izdeýge kóp kúsh jumsaý kerektigin eskertti.
Aýyl sharýashylyǵy salasynda ósim 102,3 % qurady. Agrosektorda aýqymdy jumys atqaryldy, ásirese ártaraptandyrý salasynda. Óńir basshysy agroónerkásipti odan ári damytýdyń zor múmkindikteri bar ekenin tilge tıek etti.
Investıtsııa tartý boıynsha respýblıkalyq orta kórsetkish 105,5% bolsa, oblystyq 111,5% qurap otyr. Qumar Aqsaqalov ınvestıtsııa ósimi bıýdjettik aqshanyń esebinen emes, jeke salymdardyń esebinen bolýy kerektigin basa aıtty.
Qurylys salasynda el kórsetkishi - 101,9%, al SQO-da - 104,5%. Oblys turǵyn úı qurylysy boıynsha jospardy oryndap, 200 myń sharshy metr baspana turǵyzdy. Bıylǵy meje 229 myń sharshy metr.
2017 jyly oblysta 30714 adam jumysqa ornalasty, ótken jylmen salystyrǵanda 7428 adamǵa kóp. 13392 turaqty jańa jumys oryndary ashyldy. Osynyń arqasynda óz-ózin qamtamasyz etip otyrǵan azamattardyń sany 10 myńǵa azaıyp, 88 myńdy qurady. Bul baǵytta jumys odan ári jalǵasady.
Otyrysta kóshi-qon máselesi de talqyǵa tústi. Negizinen, halyq basqa óńirlerge jalaqysy joǵary jumys izdep ketedi. 2018 jyly eńbekaqyny kóterý boıynsha jumys odan ári kúsheıtiledi. Bńir basshysynyń aıtýynsha, basqa óńirlerden adamdardy tartý, jańa jumys oryndaryn ashý, jumys berýshilermen jumys jasaý arqyly tıisti kórsetkishterge qol jetkizýge bolady.
Oblys ákiminiń orynbasarlaryna, basqarma basshylary men aýdan ákimderine 15 aqpanǵa deıin Elbasy Joldaýyn júzege asyrý úshin jol kartasyn ázirleý tapsyryldy.
