SQO aýyl mektebinde akt zalynyń tóbesi opyrylyp tústi
PETROPAVL. QazAqparat – Soltústik Qazaqstan oblysy Aqqaıyń aýdany Toqýshy aýylynda mekteptiń akt zalynyń tóbesi jartylaı opyrylyp qulady, dep habarlaıdy QazAqparat tilshisi.
Oqıǵaǵa qatysty oblystyq bilim basqarmasy túsinikteme berdi.
Vedomstvonyń baspasóz qyzmeti habarlaǵandaı, shatyr jartylaı opyrylǵan.
Akt zaly Toqýshy mektep-gımnazııasynyń ǵımaratyna japsarlas ornalasqan. Zardap shekkender joq.
«Oqıǵa ornyna ýákiletti organdardyń basshylary bardy. Mán-jaıdy anyqtaý jáne shara qabyldaý úshin arnaıy komıssııa quryldy. Aldyn ala sebep – irgetastyń shógýi jáne shatyrdan sýdyń aǵýy. Bıyl ákimdik mektepti jóndeýge qosymsha qarajat bólip, bas mekteptiń shatyryn, akt zaly men ınternat ǵımaratynyń shatyryn aýystyrýdy kózdep otyr», - dedi baspasóz qyzmeti.
Mektep-gımnazııada 293 oqýshy bilim alady. Másele sheshilgenshe olar qashyqtan oqıdy.
Illıýstratsııalyq sýret