SQO aýmaǵynda joldar jóndeledi - Ulttyq ekonomıka mınıstrligi
«Halyqtyń ómir súrý sapasyn arttyrý jáne jaǵdaılaryn jaqsartý maqsatynda turǵyn úı, ınjenerlik-kommýnıkatsııalyq ári tsıfrlyq ınfraqurylymdy damytý jónindegi jobalar iske asyrylatyn bolady. «Aýyl - El besigi» jobasy aıasynda 307 tirek jáne spýtnıktik aýyldarda jańa óńirlik standarttarǵa sáıkes joldar, aýrýhanalar, dárigerlik ambýlatorııalar, mektepter, balabaqshalar, mádenıet úıleri jáne basqa da nysandar salynyp, jóndeletin bolady», - dedi mınıstr.
Onyń aıtýynsha, qalalar men aýyldarda 412 shaqyrym sýmen jabdyqtaý jáne sý burý júıelerin rekonstrýktsııalaý júzege asyrylady. Bul rette 100% aýyz sýmen qamtamasyz etýge múmkindik beredi.
«Sondaı-aq, 2,3 mln sharshy metr nemese 21,7 myń páter salý jáne paıdalanýǵa berý josparlanyp otyr. Óńirdiń barlyq qalalary, tirek jáne spýtnıktik aýyldary keńjolaqty ınternetke qoljetimdilikpen qamtamasyz etiledi. Shamamen 2 100 shaqyrym joldy jóndeý jáne rekonstrýktsııalaý júrgiziletin bolady, bul 2025 jylǵa qaraı jaqsy jáne qanaǵattanarlyq jaǵdaıdaǵy joldardyń úlesin 98 paıyzǵa deıin jetkizýge múmkindik beredi», - dedi Á. Erǵalıev.
Budan buryn habarlanǵandaı, búgin Úkimet otyrysynda QR Ulttyq ekonomıka mınıstri Áset Erǵalıev Soltústik Qazaqstan oblysynyń 2021-2025 jyldarǵa arnalǵan áleýmettik-ekonomıkalyq damýynyń keshendi josparyn tanystyrdy. Jospardy iske asyrýdyń jalpy somasy 1,8 trln teńge.