SQO aýmaǵynda Reseıde tirkelgen 6 myńnan astam avtokólik júr
Reseımen shekaralas jatqandyqtan bolar SQO aýmaǵynda Reseıdiń nómirin taqqan kólikter jıi kezdesedi. Rýbl qymbattamaı turyp kórshi elden táýir kólik ákelý tıimdi boldy. Tamyr-tanysy barlar olardy sol jaqta tirkeýden ótkizse, ondaı múmkindigi joqtar táýekelge bel býyp, kólikti esh tirkeýsiz minip júr.
SQO polıtsııa departamentiniń málimetinshe, óńirde qazirgi ýaqytta Reseıde tirkelgen 6 myńnan astam avtokólik bar.
«QR ІІM tapsyrmasymen SQO boıynsha memlekettik kirister departamentimen birge 2021 jyldyń 10 tamyzy men 2022 jyldyń qańtary aralyǵynda «Tranzıt» is-sharasy ótti. Mınıstrlikke jiberilgen tizimge sáıkes SQO aýmaǵynda Reseıden ákelingen, biraq esh jerde tirkelmegen 3 979 avtokólik júrgendigi anyqtaldy», - deıdi SQO PD ákimshilik polıtsııa basqarmasy bastyǵynyń mindetin atqarýshy Erlan Mádıev.
Al Armenııa memleketinen 2020 jyldyń 1 qańtaryna deıin ákelingen, tirkeýge bolatyn 526 avtokólik búginde SQO polıtsııasynyń bazasyna engizildi. Olardyń 450-i qazirgi ýaqytta tirkeýden ótip, sary nómirlik belgimen júr.
Erlan Mádıevtiń aıtýynsha, osy jyldyń tamyz aıyna deıin jol júrisi qaǵıdalarynyń buzýshylyqtaryn anyqtaıtyn avtomattandyrylǵan tirkeý qurylǵylary arqyly sheteldik kólikterge qatysty 1113 hattama toltyrylǵan. Aıyppuldyń jalpy sommasy 7 mln 300 myń teńgeden asady.
Sondaı-aq bıyl 41 jol-kólik oqıǵasy bolyp, saldarynan 8 adam qaıtys boldy, 69 adam jaraqat aldy.
Al mamandandyrylǵan aıyppul turaǵyna Reseı esebinde turǵan 241 avtokólik qoıylǵan. Kólik júrgizýshilerine 17 qylmystyq is qozǵalyp, 243 ákimshilik hattama toltyryldy. Sonyń bireýi kólikti basqarý quqyǵynan aıyrylǵan júrgizýshige qatysty, taǵy bireýi mindetti saqtandyrý rásimin jasamaǵany úshin, al basym bóligi belgilengen tártip boıynsha tirkelmegen kólikti basqarǵany úshin.
«Memleket basshysy Joldaýda aıtyp ótkendeı, syrttan ákelingen kólikterdi zańdastyrýǵa ruqsat berý - kólik ıeleri úshin úlken, ári jaqsy múmkindik. Prezıdent Qasym-Jomart Toqaev bastapqy tirkeý jáne kádege jaratý quny 200-250 myń teńgeden aspaý kerektigin aıtty. Bul halyq úshin jaqsy sheshim dep oılaımyn. Tek kólikter taza, ıaǵnı izdeýde jáne qylmystyq isterge qatysy bolmaýy kerek», - deıdi Erlan Mádıev.
