SQO aýmaǵynda bıyl 3,5 mln kóshet otyrǵyzyldy
PETROPAVL. QazAqparat – Soltústik Qazaqstan oblysynda 2025 jylǵa deıin 20 myń gektarǵa 100 mln túp kóshet otyrǵyzylýy tıis. Bıyl onyń 3,5 mıllıony egildi, dep habarlaıdy QazAqparat tilshisi.
SQO Tabıǵı resýrstar jáne tabıǵat paıdalanýdy retteý basqarmasynyń málimetinshe, memlekettik orman qory 549,6 myń ga alyp jatyr, onyń 439,8 myń ga – ormandy alqap. Prezıdenttiń byltyr qyrkúıek aıynda bergen 2 mlrd aǵash otyrǵyzý tapsyrmasyna oraı óńirde keshendi jospar ázirlendi. Osy josparǵa sáıkes orman sharýashylyǵy mekemeleri 2021-2025 jyldar aralyǵynda 20 myń gektar alańǵa 100 mln túp kóshet otyrǵyzýdy josparlap otyr.
«Bıyl jospar boıynsha 850 ga alqapqa aǵash otyrǵyzýymyz qajet edi, biz is júzinde 868 ga 3,5 mln astam kóshet otyrǵyzdyq. Aldaǵy jyldarǵa kóshet alý úshin orman mekemeleriniń ýaqytsha pıtomnıkteriniń 9,3 ga alqabyna qaıyń men qaraǵaı tuqymy sebildi. Egis alańy men otyrǵyzylatyn materıal kólemi jyl saıyn ulǵaıady», - deıdi basqarmanyń bólim basshysy Vasılıı Labanchýk.
Orman sharýashylyqtarynda kóshet otyrǵyzatyn 34 turaqty jáne ýaqytsha pıtomnıkter bar, aýmaǵy ázirge 218 ga, aldaǵy birer jylda ol taǵy 75 ga ulǵaıtylmaq.
Mamannyń aıtýynsha, qazirgi ýaqytta qaraǵaı búrshikterin jınaý jumystary bastaldy. Qaraǵaı búrleri qazannan naýryz aıyna deıin jınalady. Bıyl keshendi josparǵa sáıkes ony jınaý kólemi birneshe esege artty. Mamandar 13500 kg jınap alýlary tıis. Búginge deıin orman sharýashylyqtary boıynsha 2 myń kg astam qaraǵaı búrshikteri daıyndaldy.
