SQO aýmaǵynan shyǵý úshin endi PTR test anyqtamasy kerek – dárigerler

PETROPAVL. QazAqparat – Soltústik Qazaqstan oblysynda karantındik shekteýlerdiń kúsheıtilýine baılanysty budan bylaı PTR test nátıjesi bolmasa turǵyndar óńir aýmaǵynan shyǵa almaıdy, dep habarlaıdy QazAqparat tilshisi.

SQO Sanıtarııalyq-epıdemıologııalyq baqylaý departamenti mamandary óńirde karantındik sharalardy kúsheıtýge qatysty brıfıng ótkizdi.

Sanıtarııa dárigerleriniń aıtýynsha, PTR-test nátıjesi oblys aýmaǵynan shyǵatyn barlyq jolaýshylarǵa kerek.

«SQO-da PTR-testti 4 zerthanada jasatýǵa bolady. Onyń biri - Sanıtarııalyq-epıdemıologııalyq baqylaý departamentiniń Ulttyq saraptama ortalyǵynda ornalasqan. Taǵy biri – pýlmonologııa ortalyǵynda ornalasqan. Sondaı-aq eki jekemenshik klınıkada jasatýǵa bolady. Taǵy bir jekemenshik zerthana qarasha aıynyń 20-synan keıin ashylady dep josparlanǵan. Onda 2 myńǵa deıin test jasatýǵa bolady. Ulttyq saraptama ortalyǵy jeke tulǵalarǵa 8 myń teńgege, zańdy tulǵalarǵa 9 myń teńgege jasaıdy. Zerthanalar úlgerip jatyr, eshqandaı dúrligý joq», - deıdi SQO Sanıtarııalyq-epıdemıologııalyq baqylaý departamenti basshysynyń mindetin atqarýshy Tatıana Gorlova.

Sanıtarııa dárigeriniń aıtýynsha, sońǵy kezde syrttan kelýshiler arasynda KVI-di juqtyrýshylar kóbeıgen. 6 qazan men 2 qarasha aralyǵynda Reseımen shekaralas baqylaý pýnktteri arqyly 15 663 adam ótken. Onyń shamamen 4,5 myńynda ǵana anyqtama bolǵan. 1400-deı adam karantınge alynyp, COVID-19 tekserildi. Nátıjesinde 118 adamnan koronavırýs anyqtaldy. 77 sheteldik PTR-test nátıjesi bolmaǵandyqtan keri qaıtarylǵan.

«Koronavırýsty juqtyrýshylar arasynda júk tasymaldaýshylar kóp. Qazan aıynda Reseıden kelgen 104 adamda KVI anyqtalsa, sonyń 24-i júk kólikteriniń júrgizýshileri. Sonyń ishinde júk tasymaldaýshylardyń 22-si – basqa óńirlerdiń turǵyndary. Olarda qaýipti ınfektsııa SQO aýmaǵynda anyqtalǵandyqtan, osy óńirdiń statıstıkasyna kiredi», - deıdi Tatıana Gorlova.