SQO aýmaǵynda sý deńgeıi kóterilip jatyr

ASTANA. KAZINFORM – 15 sáýirden SQO aýmaǵynda sý deńgeıi qaıtadan kóterilip jatyr. Bul týraly Soltústik Qazaqstan oblysy ákimi apparatynyń jumyldyrý daıyndyǵy jáne azamattyq qorǵaý bóliminiń basshysy Serik Ǵaısın aıtty.

«Oblysta sý tasqynynyń birinshi tolqynynyń negizgi kezeńi ótti. Bógetten asyp ketýdiń maksımaldy deńgeıi 425 sm boldy. Sonyń saldarynan 3 419 úıdi sý basty. Áli de 3 223 úıdi sý basyp tur, 196 úıdegi qaýip seıildi. 14 388 adam evakýatsııalandy, 764 adam úılerine oraldy. Qazir sý basqan aýmaqtyń turǵyndary ýaqytsha turǵylyqty jerge kóshirilip jatyr», - dedi S. Ǵaısın Ortalyq kommýnıkatsııalar qyzmetindegi brıfıngide.

Onyń aıtýynsha, Aqmola oblysynan kelgen sýǵa baılanysty 15 sáýirden SQO aýmaǵynda sý deńgeıi qaıtadan kóterilip jatyr. 21-22 sáýirde óńirdegi sý deńgeıi joǵary shegine jetýi múmkin.

«Keltirilgen materıaldyq shyǵyndy óteýge qatysty turǵyndardan ótinish qabyldanyp jatyr. Qazir 1 717 otbasy 100 AEK kóleminde jalpy somasy 634 mln teńgeni quraıtyn birjolǵy járdemaqy aldy. Oblysqa 576 tonna gýmanıtarlyq kómek jetkizildi», - dedi azamattyq qorǵaý bóliminiń basshysy.