SQO aýylyndaǵy apattyq mektep máselesi tolyq sheshildi
PETROPAVL. KAZINFORM – Soltústik Qazaqstan oblysy Dragomırovka eldi mekeninde oqý jyly qarsańynda jańa bilim ordasy paıdalanýǵa berildi. Jalpy bıyl óńirde úsh mektep jáne eki balabaqshanyń qurylysy aıaqtalmaq.
Taıynsha aýdany Dragomırovkada boı kótergen eńseli mektep apatty turǵan ǵımarattyń ornyna salyndy. Endi bul oqý ornynda 129 bala bilim alady. Zamanaýı jabdyqtalǵan nysanda oqýshylarǵa bar jaǵdaı jasalǵan. Synyp bólmeleri keń, jaryq, yńǵaıly jıhazben jáne qajetti qural-jabdyqpen tolyq qamtylǵan.
«Bıyl 8 oqýshy alǵash ret mektep tabaldyryǵyn attaıdy. Jalpy mektep 11 jyldyq. Túlekterimiz jylda Ulttyq biryńǵaı testileýden jaqsy nátıje kórsetip, grantpen joǵary oqý ornyna túsedi. Aýyl respýblıkalyq avtojoldyń boıynda ornalasqan. Turǵyndarymyz jetkilikti. Sol sebepti mektepke degen qajettilik bar», - deıdi Dragomırov orta mektebiniń dırektory Murat Kúlenov.
Jańa mektep bir jyldyń ishinde boı kóterdi. Mektep ujymy men aýyl turǵyndaryn SQO ákimi Ǵaýez Nurmuhambetov quttyqtady. Bıyl budan bólek taǵy 1,5 myń bala jańa bilim ordasynda oqymaq.
«Memleket basshysy balalardyń bilim alýyna bar jaǵdaıdy jasaý kerektigin basa aıtty. Aıta ketý kerek, mekteptiń qurylysyna qarjy bilim ınfraqurylymy qorynan bólindi. Osylaısha, aýyl balalary men ustazdarǵa bar jaǵdaı jasalyp otyr. Sondaı-aq, oblys ortalyǵynda arnaýly-mekteptiń, «Jaıly mektep» ulttyq jobasy aıasynda «Orman» jáne «Bereke» shaǵyn aýdandarynda eki mekteptiń qurylysy aıaqtalýǵa jaqyn. «Jas Órken» jáne «Kopaı» shaǵyn aýdandarynda taǵy eki mekteptiń qurylys bastalady», - dedi Ǵaýez Nurmuhambetov.
Dragomırovkadaǵy mekteptiń qoldanysqa berilýimen SQO-da apatty mektepterdiń máselesi sheshildi.
Buǵan deıin SQO-da 50 shaqty mektepte ınternet jyldamdyǵy óte tómendigin jazǵan edik.
