SQO aýylynda 35 qyz kúrespen aınalysyp júr
PETROPAVL. KAZINFORM — Soltústik Qazaqstan oblysyndaǵy Meńgeser aýylynda 35 jasóspirim qyz kúrespen aınalysady. Nátıjesi de joq emes. Birer kún buryn 17 jasar Anna Stratan Iordanııada ótken Álem chempıonatynan qola júldemen oraldy.
SQO Mamlıýt aýdanyndaǵy Meńgeser aýylynda ul-qyzdardyń kúreske degen qyzyǵýshylyǵy joǵary. Sol sebepti munda oblystyq balalar men jasóspirimder kúres mektebiniń fılıaly jumys isteıdi.
Rýslan Dáýletov — tájirıbeli bapker, otyz jylǵa jýyq aýyl balalaryn jattyqtyryp, jas balýandardy daıyndaýmen aınalysady.
Buryn uldardy kúreske baýlysa, qazir tobynda tek qyzdar ǵana jattyǵady. Balýan qyzdardyń jasy — 8-den 17 jasqa deıin.
Sonyń biri — jaqynda ǵana Iordanııada ótken álem chempıonatynan qola medalmen kelgen Anna Stratan. Ol Grekııa sportshysy Maırı Manıdi 5:1 esebimen jeńip, tuǵyrdan kórindi.
«Anna maǵan 7 jasynda kelip, on jyl boıy men ony jattyqtyrdym. Bıyl ol Meńkeser orta mektebinde oqýyn aıaqtap, oblystyq olımpıadalyq rezerv mektep-ınternat-kolledjine „jattyqtyrýshy-oqytýshy“ mamandyǵy boıynsha oqýǵa tústi. Eńbekqor, namysshyl sportshy, sondyqtan bul balýan úmitti áli aqtaıdy dep senemin», — deıdi Rýslan Dáýletov.
Bapkerdiń aıtýynsha, sońǵy jyldary qyzdardyń kúreske qyzyǵýshylyǵy joǵary. Olar uldarǵa qaraǵanda belsendi.
Oblystyq, respýblıkalyq týrnırlerde jaqsy nátıje kórsetip júr. Qazir Meńgeser aýylyndaǵy kúres mektebinde 35 qyz jattyqsa, sonyń 90% — oblys chempıondary.
Buǵan deıin Petropavlda boks ardagerleri arasynda halyqaralyq ashyq týrnır ótkenin jazǵan edik.
