SQO aýdandarynda jem-shóp daıyndaý máseleleri boıynsha jedel shtabtar quryldy
SQO aýyl sharýashylyǵy jáne jer qatynastary basqarmasy basshysynyń orynbasary Talǵat Naýryzbaevtyń aıtýynsha, óńirde 390 myń iri qara mal, 400 myń usaq mal jáne 103 myń jylqy bar. Qystan qysylmaı shyǵý úshin 850 myń tonna shóp, 793 myń tonna saban, 765 myń tonna jemazyq jáne 190 myń tonna súrlem qajet. Qazirdiń ózinde qajetti shóptiń 68 %-y jınaldy.
«Baǵaǵa júıeli túrde monıtorıng júrgizip otyramyz. Turǵyndardy arzan shóppen qamtý maqsatynda aýyl sharýashylyǵy jármeńkeleri uıymdastyrylyp jatyr. 250 sharýashylyq qatysqan 29 jármeńke ótti. 881 tonna shóp satyldy. Tonnasy 15 myń teńge. 186 tonna jem jáne 42 tonna kebek saýdalandy», - deıdi Talǵat Naýryzbaev.
SQO-da mundaı jármeńkelerde kebektiń tonnasy 20-45 myń teńge, jemazyq 40-50 myń teńgeden saýdalanýda.
«Oblys aýdandarynda qysqa qajet shem-shópti kerekti mólsherde ázirlep alý maqsatynda jedel shtabtar jumys istep jatyr. Olar osy máselege qatysty úılestirip otyrady. Qazir shabyndyqtarda 1200-deı brıgada júr. Olar negizinen qajetti tehnıkasy bar jáne jumyssyz júrgen aýyl turǵyndarynan qurylǵan.
Budan basqa memlekettiń qoldaýyn kórip otyrǵan sharýashylyqtarmen memorandýmdar jasaldy. Olar aýyl turǵyndaryna jem-shópti naryqtaǵy baǵadan tómenge satatyn bolady. Sondaı-aq agroqurylymdar paı esebinen de qamtamasyz etedi, óz jumysshylaryn da nazardan tys qaldyrmaıdy», - deıdi basqarma basshysynyń orynbasary.
Talǵat Naýryzbaevtyń aıtýynsha, oblysta jurt dúrligip, jappaı maldaryn soıyp jatqan joq. Oǵan negiz joq. Shóp shabylyp jatyr, egin oraǵy bastalysymen saban, jem bolady.
«Kerisinshe, óńirde mal basynyń kóbeıgenin kóremiz. Máselen iri qara mal 3,5 %-ǵa, qoı-eshki 3,3 %-ǵa, jylqy 2 % -ǵa kóbeıgen. Bul sharýashylyqtardaǵy
ósim. Turǵyndardyń qoralaryndaǵy mal sany da birneshe paıyzǵa artqan», - deıdi Talǵat Naýryzbaev.
