SQO: Aýdan ortalyǵynda alǵashqy qan tazartý kabıneti ashyldy
PETROPAVL. QazAqparat - Taıynsha aýdanynyń ortalyq aýdandyq aýrýhanasynda qan tazartý kabıneti ashyldy, dep habarlaıdy QazAqparat tilshisi.
Óńirlik kommýnıkatsııalar qyzmetiniń málimetinshe, kabınetti qajet quraldarmen jabdyqtaýǵa 50 mıllıon teńgeden astam qarjy jumsalǵan. Bul - oblys aýdanyndaǵy alǵashqy qan tazartý kabıneti.
«Bizdiń aýdan boıynsha protsedýradan ótip jatqan 12 adam tirkeldi. Bul is kepildendirilgen tegin medıtsınalyq kómek aıasynda júrgizilip jatyr. Sozylmaly búırek jetispeýshiligi dertine shaldyqqan naýqastar aptasyna 3 ret qandaryn tazartýy kerek. Bir apparatpen birden úsh adamdy qabyldaı beremiz. Aýysymda 6 adamnyń qanyn tazartamyz. Protsedýra 4 saǵat ýaqytty alady», - dedi Taıynsha ortalyq aýdandyq aýrýhanasynyń bas dárigeri Anatolıı Rafalskıı.
Densaýlyq saqtaý basqarmasynyń basshysy Tımýr Sultanǵazıevtiń aıtýynsha, óńirde qanyn tazartýdy qajet etetin naýqastardyń sany azdap kóbeıgen.
«Ótken jyly 125 bolǵan, bıyl 137 adamǵa jetip otyr. Bul naýqastardy dıagnostıkalaýmen baılanysty dep otyrmyz. Sebebi búırek jetispeýshiligi jasyryn túrde ótetin aýrý, sondyqtan tekseristen ótip, anyqtaý kerek», - dedi T. Sultanǵazıev.
Petropavldaǵy alǵashqy «Nefros - SK» qan tazartý ortalyǵy 2014 jyly №3 qalalyq aýrýhananyń negizinde ashylǵan edi. Onda 12 apparat bar. Dál qazir 62 naýqas em qabyldap jatyr.
«Bizdiń ortalyq qala jáne aýyl turǵyndaryn birdeı qabyldaı beredi. Alaıda emge baryp kelý yńǵaısyz ári qymbat. Sol sebepti naýqastar oblys ákimine barǵan. Nátıjesinde halyqqa oblys aýdandarynda dıalızdik ortalyqtardy ashý týraly usynys jasaldy», - dedi «Nefros - SK» JShS dırektory Lılııa Gmyzına.
Qan tazartý úshin Taıynsha aýdanyna Aqjar, Ýálıhan jáne Aıyrtaý aýdandarynyń turǵyndary keletin bolady. Sondaı-aq, osyǵan uqsas kabınetti Shal aqyn aýdanynda ashý josparlanyp otyr.
