SQO: Árbir tórtinshi jol apatynan jaıaý adamdar japa shegedi
PETROPAVL. QazAqparat – Soltústik Qazaqstan oblysynda jyl basynan beri 200-ge jýyq jol-kólik oqıǵasy tirkelse, sonyń ár tórtinshisinde jaıaý júrginshini kólik qaqqan, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, joldarda jazataıym oqıǵalardyń aldyn alý maqsatynda is-sharalar júrgizilip keledi. Oblys joldarynda 7 aı ishinde 184 jol-kólik oqıǵasy tirkeldi. Onyń 43-i – júrginshilerdi qaǵyp ketý faktisi. Dálirek aıtqanda, bul árbir tórtinshi jol apaty. Saldarynan 5 adam qaza taýyp, 45-i jaraqat alǵan. Onyń ishinde 19 jol-kólik oqıǵasy jaıaý júrginshilerdiń kinásinen bolǵan.
Kóbinese petropavldyqtar «Altyn arman» jáne «Taıga» bazarlary mańynda joldyń belgilenbegen jerinen ótip, óz ómiri men densaýlyǵyn qaterge tigedi. Bul kósheler oblys ortalyǵyndaǵy avtokólik aǵyny kóp qaýipti ýchaskelerdiń biri. Reıdtiń eki saǵaty ishinde kósheni belgilenbegen jerden kesip ótkeni úshin 6 ákimshilik hattama toltyryldy. Sondaı-aq polıtseılerdiń kózinshe kishkentaı balalary bar analar joldan ótken. Olardyń birinde besikarba bolǵan.
«Jazǵy demalys kezinde qala kóshelerinde balalar sany artady. Olar kóp jaǵdaıda ata-ana áreketin qaıtalaıdy, ıaǵnı joldan ótý daǵdylary da eresekterge qarap qalyptasatynyn túsingen jón. Erteń balalar sizge eliktep jolǵa shyǵyp ketýi múmkin. Aıta ketetin jaıt, jolda zardap shekkenderdiń jeteýi – kámelet jasyna tolmaǵandar. Qazirgi ýaqytta polıtseıler «Qaýipsiz jol» aktsııasy aıasynda jumys istep jatyr. Ol 19 shildede bastaldy. Osy ýaqyt ishinde jol júrisi erejelerin buzǵany úshin 606 jaıaý júrginshi jáne jol qozǵalysynyń ózge de qatysýshylary ákimshilik jaýapkershilikke tartyldy. Sońǵy eki aptada tek Petropavlda ǵana 100-ge jýyq jaıaý júrginshi jol erejesin buzdy», - deıdi SQO PD jergilikti polıtsııa qyzmeti basqarmasy bastyǵynyń mindetin atqarýshy Grıgorıı Tysh.
Foto: tengrinews.kz
