SQO Aralaǵash aýylynyń mańyndaǵy kanalda balyq qyrylyp jatyr
PETROPAVL. KAZINFORM – Soltústik Qazaqstan oblysy Aqqaıyń aýdany Aralaǵash aýylynyń mańyndaǵy kanal ólgen balyqqa tolǵan.
Bul týraly óńir turǵyndarynyń biri áleýmettik jelide jarııalap, máselege nazar aýdardy.
Qyrylǵan balyqta esep joq. Kýágerdiń aıtýynsha, balyq óleksesi búkil kanal boıy sý betinde jaıylyp jatyr.
SQO Aqqaıyń aýdany ákimdigi bul oqıǵaǵa qatysty túsinik berdi.
- Bul kanal avtojoldyń boıynda ornalasqan. Balyqtyń qyrylýyna sýda otteginiń jetispeýshiligi sebep bolýy múmkin. Qysta jáne erte kóktemde temperatýranyń ózgerýine baılanysty sý nysandarynda ottegi deńgeıi aıtarlyqtaı tómendeıdi. Bul ásirese sý bıoresýrstary úshin qaýipti: ottegi jetispegendikten balyq qyrylady. Mundaı jaǵdaıǵa jol bermeý úshin sýdaǵy ottegi quramyn anyqtap, qysta, mysaly, aeratsııa júrgizý kerek, - delingen ákimdiktiń jaýabynda.
Mamandardyń aıtýynsha, SQO Tabıǵı resýrstar jáne tabıǵat paıdalanýdy retteý basqarmasy bul máselege qanyq. Oqıǵa ornyna jaýapty qyzmetter kelip, jaǵdaıdy vızýaldy tekserýden ótkizdi.
Tekserý qorytyndysy boıynsha zerthanalyq taldaý júrgizý úshin sý men bıomaterıal synamalaryn alý qajettiligi týraly sheshim qabyldandy. Alynǵan málimetter negizinde qoldanystaǵy zańnama aıasynda tıisti sharalar qabyldanatyn bolady.
Buǵan deıin mańǵystaýlyq balyqshylardyń túnde balyq aýlaýǵa ruqsat surap, beınejazba túsirgenin jazǵan edik.