SQO alqaptarynda qar toqtatý jumystary qarqyn aldy

PETROPAVL. QazAqparat – Soltústik Qazaqstan oblysynda bıyl qardyń azdyǵynan sharýalar alqaptarda qar toqtatý jumysyn júrgizip jatyr, dep habarlaıdy QazAqparat tilshisi.

Ósimdik sharýashylyǵynda qýańshylyqpen kúrestiń bir joly – qar toqtatý jumysyn júrgizý. Bul jumys ádette qystyń eń borandy aıy – aqpanda júrgiziledi.

Bıyl qardyń azdyǵynan bul agrotehnıkalyq tásil kóptegen sharýashylyqtarda qolǵa alyndy.

Máselen, Mamlıýt aýdanyndaǵy Tokarevka eldi mekenindegi «Hýlandoı» JShS-gi osy kúnge deıin 1100 ga alqapta qar toqtatty.

Qazir seriktestiktiń egistik jerlerinde 3 tehnıka jumys istep jatyr. 20 aqpanǵa deıin bul sharýany aıaqtamaq.

«Jalpy 2700 ga egistik alqabymyz bar. Sonyń 1700 ga-na qar toqtatýdy josparlap otyrmyz. Topyraq zertteýshilerdiń aıtýynsha, toqtatylǵan qardyń tek 30 %-y ǵana topyraqqa sińedi eken. Soǵan qaramastan bul agrotehnıkalyq tásildiń bereri mol. Óıtkeni bizdiń óńir qurǵaqshylyqqa beıim, kóktemde 30 kún boıy jel turady. Al bul jumystar qajetti ylǵalmen qamtamasyz etedi. Qazir bıdaı sebetin alqapta tehnıka júr. Kúzde jeri jyrtyldy, óıtkeni, qurǵaq boldy. Bul da ylǵaldy saqtaýdyń bir joly. Byltyr kún ystyq boldy, boljam boıynsha bıyl da jaz ystyq bolmaq. Sondyqtan jaqsy ónim alý úshin osy bastan iske kiristik», - deıdi sharýashylyqtyń agronomy Musa Saǵyndyqov.

SQO-da byltyr qurǵaqshylyqqa qaramastan keı sharýashylyqtar ár gektardan 20 tsentnerden ónim aldy.

Bul, mamandardyń aıtýynsha, ósimdik sharýashylyǵynda jumystardy keshendi atqarýdyń nátıjesi.

Óıtkeni jaqsy ónim ylǵaldyń jetkiliktiginen, sapaly tuqymnan, zamanaýı tehnıkadan jáne túrli tyńaıtqyshtardy ýaqtyly qoldanýdan alynady.

Memleket te óz tarapynan qoldaý kórsetip keledi. Byltyr óńirdiń dıqandary 53,8 mlrd teńge sýbsıdııa aldy.