SQO alqaptarynda bıyl ylǵal qory jetkilikti

PETROPAVL. KAZINFORM — Soltústik Qazaqstan oblysynda bıyl 4,4 mln ga dándi daqyldar egý josparlanǵan.

SQO aýyl sharýashylyǵy jáne jer qatynastary basqarmasynyń basshysy Dáýren Toqkýjınovtyń aıtýynsha, kúzgi-qysqy kezeńde ylǵaldyń mol jınalýyna baılanysty bıylǵy kóktemgi egis naýqany sońǵy jyldarmen salystyrǵanda eń qolaıly jaǵdaıda ótpek. Qazir topyraqtyń bir metrlik qabatyndaǵy ylǵal qory keı jerde 129 mm-ge jetken, bul ortasha kópjyldyq mánnen 71 mm kóp.

— Prezıdenttiń aýyl sharýashylyǵy óniminiń kólemin eki esege ulǵaıtý jónindegi tapsyrmalaryn iske asyrý aıasynda jol kartasy ázirlenip, Aýyl sharýashylyǵy mınıstrligi tıisti ındıkatorlardy bekitti. Bıyl 4,4 mln ga, sonyń ishinde dándi daqyldar — 3,3 mln ga, maıly daqyldar — 760 myń ga, bul byltyrǵydan 85 myń ga artyq, jemshóp — 392 myń ga, kartop — 6,5 myń ga, kókónister — 1,3 myń ga egiledi. Mınıstrlikpen belgilengen ındıkatorlardy oryndaý aıasynda bıyl fermerler 333,5 myń tonna mıneraldy tyńaıtqyshty qoldanady. Ortasha norma 76 kg/ga, bul byltyrmen salystyrǵanda 30% artyq, — deıdi basqarma basshysy.

Sýbsıdııalaý jáne tómen paıyzben kredıtteý agrarıılerge qajetti preparattardy ýaqytynda satyp alýǵa kómektespek. Bıyl memleketten osy maqsatqa 3,6 mlrd teńge baǵyttalǵan.

— Osy jyly oblys boıynsha 11,2% tuqym jańartylady, bul — 52,6 myń tonna. Tehnıka qazir 97% daıyn. Bıyl agrarııler 12,1 mlrd teńgege 365 tehnıka satyp aldy. Kóktemgi dala jumystaryn atqarý úshin oblysqa 58 myń tonna dızel otyny qajet. Bul maqsatqa memlekettik qoldaý retinde lıtrine 254 teńgeden 52,2 myń tonna jeńildetilgen dızel otyny bólindi, — deıdi Dáýren Toqkýjınov.

Mamannyń aıtýynsha, bıylǵy jyly eginshilikti sýbsıdııalaýǵa jalpy 36,8 mlrd teńge bólingen, onyń ishinde tyńaıtqyshtarǵa — 23 mlrd teńge, pestıtsıdterge — 11,6 mlrd teńge, tuqymdarǵa — 1,9 mlrd teńge, basymdyq berilgen daqyldarǵa — 0,3 mln teńge.

Buǵan deıin CQO-da byltyr josparlanǵan, biraq iske asyrylmaǵan jobalar jaıly jazǵan edik.