SQO áleýmettik medıtsınalyq saqtandyrý qoryna 50 mln teńge qaryz
SQO-da mindetti áleýmettik medıtsınalyq saqtandyrýdy júzege asyrý jónindegi aımaqtyq shtabtyń otyrysy ótti. Shtab jumysy barysynda SQO-da mindetti áleýmettik medıtsınalyq saqtandyrýdy júzege asyrý máseleleri qaraldy.
«Áleýmettik medıtsınalyq saqtandyrý qory» KEAQ SQO boıynsha fılıaly baspasóz qyzmetiniń málimetinshe, búgingi kúni oblysta 102 072 adam saqtandyrylmaǵan. Onyń ishinde 28 072 adam nemese óńir turǵyndarynyń 27% mindetti medıtsınalyq saqtandyrýǵa bir de tólem jasamaǵan.
«16 130 adam mindetti medıtsınalyq saqtandyrý júıesinen shyǵaryldy. Maýsymdyq jumysshylar jumystan bos ýaqytynda da tólemdi óz betinshe júrgizýi kerek. Saqtandyrý júıesinen shyǵarylýynyń ekinshi sebebi - biryńǵaı jıyntyq tólemderin ýaqtyly tólemeý. «Saqtandyrylǵan» mártebesi kelesi aıǵa tólem jasalǵan sátten bastalady, ıaǵnı, sáýirge tólem jasasańyz, siz tek sáýirge saqtandyryldyńyz. Mamyr aıynda siz tólemdi tólegen kúnnen bastap saqtandyrylasyz. Sondyqtan, biryńǵaı jıyntyq tólemdi aı saıyn nemese toqsan saıyn tóleý usynylady», - deıdi «Áleýmettik medıtsınalyq saqtandyrý qory» SQO fılıalynyń dırektory Larısa Gordeeva.
SQO memlekettik kirister basqarmasynyń málimeti boıynsha, óńirde mindetti áleýmettik medıtsınalyq saqtandyrý qoryna qaryz 48 mln 972 myń teńgeni qurady, onyń ishinde 509 zańdy tulǵa 43 mln 587 myń teńge, sýbektiler men 1 446 jeke kásipker 5 mln 315 myń teńge bereshek.
«Aıyrtaý, Taıynsha, Ǵ.Músirepov atyndaǵy aýdandar qorǵa qaryz boıynsha alda tur. Saqtandyrylmaǵan azamattar josparly, statsıonarlyq kómek ala almaıdy, sondaı-aq emhanalarda konsýltatsııalyq-dıagnostıkalyq kómekten qaǵylady, testileýden óte almaıdy jáne qymbat turatyn KT, MRT, ýltradybys tekserister olar úshin aqyly bolmaq», - deıdi Larısa Gordeeva.
