SQO AQSh-tyń agrarlyq saladaǵy úzdik tehnologııalaryn engizýge múddeli
PETROPAVL. QazAqparat – Soltústik Qazaqstan oblysynyń ákimi Qumar Aqsaqalov AQSh-tyń Qazaqstandaǵy Tótenshe jáne Ókiletti elshisi Ýılıam Mozermen kezdesip, seriktestik máselelerin talqylady, dep habarlaıdy QazAqparat tilshisi.
SQO ákimi baspasóz qyzmetiniń habarlaýynsha, kezdesý barysynda aýyl sharýashylyǵy taqyrybyna, agrarlyq tehnıka jasaý, ónimdi qaıta óńdeýge basa nazar aýdaryldy.
«Bizdiń jerimiz qunarly, osy ereksheligin durys paıdalanǵan jaǵdaıda jaqsy ónim alýǵa bolady. Oblystyń áleýeti joǵary, ony úzdik tehnologııalardy engizý, bilikti kadrlardy jumysqa tartý arqyly damytý qajet. Ǵylym bir orynda turmaıdy, biz agroónerkásip keshenindegi zamanaýı úrdiske ilesip otyrýymyz qajet. Óńirde jańa tehnologııalardy, tehnıkany qoldaný, mamandardy arnaıy daıyndyqtan ótkizý aýyl sharýashylyǵy óniminiń kólemin arttyrady», - dedi Qumar Aqsaqalov.
AQSh elshisi Ýılıam Mozerdiń pikirinshe, eki jaqty qarym-qatynastyń bolashaǵy zor.
«Soltústik Qazaqstan oblysy bizdi erekshe qyzyqtyrady. Óıtkeni, elimizdegi Dakota sııaqty shtattarmen klımat jaǵynan óte uqsas. Bizdiń sharýalardyń jermen jumys isteýde tájirıbesi joǵary. Ózimizdiń úzdik tehnologııalardy sizderde engizýge ábden bolady. Birlesken bıznes jobalardy júzege asyrýǵa barynsha qoldaý kórsetemiz», - dedi AQSh elshisi.
Soltústik Qazaqstan oblysynyń AQSh-pen qarym-qatynasy damyp keledi. Óńirde amerıkalyq aýyl sharýashylyǵy tehnıkasy úlken suranysqa ıe. Bıylǵy jyldan bastap AQSh-qa soltústikqazaqstandyq kilegeı eksporttalady. Gýmanıtarlyq salada da baılanys ornaǵan.
