SQO: Aqpanda 1 myńnan astam adam COVID-19-ǵa qarsy ekpe alady

PETROPAVL. QazAqparat – Soltústik Qazaqstan oblysynda koronavırýsqa qarsy ekpe birinshi kezekte medıtsına qyzmetkerlerine jasalady. Aqpan aıynda 1 myńnan astam adamǵa vaktsına egiledi, dep habarlaıdy QazAqparat tilshisi.

SQO densaýlyq saqtaý basqarmasynyń málimetinshe, óńirde 17 pýnkt COVID-19-ǵa qarsy vaktsına egýge daıyndalǵan. Onyń tórteýi Petropavlda, qalǵandary aýdan ortalyqtarynda ornalasqan. Osylaısha tek aqpan aıynda ǵana óńirdiń myńnan astam turǵynyna ekpe egilmek. Birinshi kezekte vaktsınany medıtsına qyzmetkerleri alady.

«SQO-da koronavırýs ınfektsııasyna qarsy vaktsınatsııaǵa daıyndyq qyzý júrgizilip jatyr. Barlyq emhanalarda vaktsınatsııa pýnkteri ashyldy.

Medıtsına qyzmetkerleri tolyq daıyndyqtan ótti. Reseılik «Spýtnık V» vaktsınasy egilmek», - deıdi SQO densaýlyq saqtaý basqarmasynyń bólim basshysy Ásem Qanǵojına.

SQO-da bir aptanyń ishinde koronavırýsty juqtyrǵandar sany 1,7 ese artty.

Infektsııalyq statsıonarlar búginde 45 %-ǵa tolǵan. Jalpy oblysta KVI juqtyrýdyń 10658 jaǵdaıy tirkeldi. 9700-den astam adam jazylyp shyqsa, 42 adam qaıtys boldy.