SQO ákimi tasqynǵa baılanysty turǵyndarǵa úndeý joldady
PETROPAVL. KAZINFORM – Petropavlǵa búgin-erteń úlken sý kelmek. Soltústik Qazaqstan oblysynyń ákimi Ǵaýez Nurmuhambetov sý tasqynynyń aldynda turǵyndarǵa úndeý joldady.
SQO-da sý tasqynyna qatysty jaǵdaı áli de kúrdeli. Sergeev sý qoımasynan ótken tasqyn sý Esil ózenimen tómen, Petropavlǵa qaraı kele jatyr. Joldaǵy birneshe eldi mekenge sý kirip, turǵyndardy evakýatsııalaýǵa týra keldi. Qazirgi ýaqytta Petropavlda sý basatyn aýdandardan halyq kóshirilip jatyr. Osyǵan oraı SQO ákimi Ǵaýez Nurmuhambetov turǵyndarǵa úndeý jarııalady.
«Oblys ortalyǵyna úlken sý kele jatyr. Qıyn sátte el basshylyǵy bizge qoldaý bildirýde. Prezıdentimiz Qasym-Jomart Toqaevtyń tapsyrmasy boıynsha oblysta jumys saparymen eki ret Premer-Mınıstr Oljas Bektenov boldy. Qazir oblysta Úkimet basshysynyń birinshi orynbasary Roman Sklıar tasqynǵa qarsy jumystarǵa basshylyq etti. Turǵyndardyń ómirin saqtaý - bizdiń basty mindet.
Óńirde sý tasqyny jaǵdaıy kúrdeli bolyp qala beredi. Biz sý tasqynyna qarsy barlyq qajetti sharalardy qabyldap jatyrmyz. Birinshi kezeńde eldi mekenderden erigen sýdy burý jumystary júrgizildi.
Al qazir úlken sý Esil ózenimen ótedi.
Shamamen bir-eki kúnnen keıin sý oblys ortalyǵyna jetedi. Prıbrejnoe jáne Teplıchnoe aýyldaryn, Zarechnyı kentin sý basý qaýpi bar.
Osy kúnderi biz bógetterdi salý jáne nyǵaıtý boıynsha táýlik boıy jumys istedik. Aýyz sýdy úzdiksiz jetkizý úshin birinshi kóterý sorǵy stantsııasynyń aınalasyndaǵy bógetti nyǵaıttyq.
Bizdiń eldi mekenderdi qorǵaý boıynsha buryn-sońdy bolmaǵan sharalar qabyldandy. Alaıda, bul jetkiliksiz bolýy múmkin. Petropavlǵa qaraı úlken sý aǵyny kele jatyr», - dedi oblys ákimi.
Óńir basshysy úıleri sý basý aımaǵynda ornalasqan Zarechnyı kentiniń turǵyndaryn evakýatsııalaýǵa túsinistikpen qaraýdy surady.
«Tótenshe jaǵdaılar departamentiniń, polıtsııa men qala ákimdiginiń talaptaryn múltiksiz oryndaý qajet. Bul saıajaı turǵyndaryna da qatysty.
Azamattardyń qaýipsizdigi birinshi orynda tur. Memleket basshysy Qasym-Jomart Toqaev sý tasqyny kezeńinde turǵyndardyń ómiri men densaýlyǵyn saqtaýdyń mańyzdylyǵyn atap ótti. Memleket qajetti kómek pen qoldaý kórsetedi. Ótemaqy qarastyrylǵan. Mehanızm pysyqtaldy. Eshkim nazardan tys qalmaıdy. Aýdan turǵyndarymen kezdesýler barysynda bul jaıynda aıtyldy.
Bıylǵy sý tasqyny bárimiz úshin úlken synaq. Birliktiń arqasynda biz barlyq qıyndyqtardy jeńe alamyz. Qazir tasqyn sýmen kúresýge 3 myńnan astam adam jumyldyryldy. Bul merdiger uıymdar, qurylys kompanııalary, bıznesmender, memlekettik qyzmetkerler, qutqarýshylar, kommýnaldyq qyzmetter, polıtseıler, eriktiler jáne bizdiń qala men aýdandardyń qarapaıym turǵyndary. Kómekke basqa aımaqtardan qutqarý qyzmetteri, Ulttyq ulan men Qorǵanys mınıstrliginiń qyzmetkerleri keldi. Men osy qıyn kezeńdegi kómegi úshin barlyǵyna rızamyn», - dedi Ǵaýez Nurmuhambetov.
Oblys ákimi turǵyndardan qaýipsiz jerge kóshýdi surady.
«Adam ómirinen qymbat eshteńe joq. Alaıda saqtansań, saqtaıdy! Biz bárimiz jaqsylyqtan úmittimiz, biraq bárine daıyn bolýymyz kerek. Biz turǵyndarymyzdyń qaýipsizdigin qamtamasyz etý jáne sý tasqynynyń saldaryn barynsha azaıtý úshin bar kúshimizdi salamyz», - dedi SQO ákimi.
