SQO ákimi Petropavldyń atyn ózgertý týraly: Qazir bul másele ózekti emes
ASTANA. KAZINFORM – Úkimet otyrysynan keıin jýrnalıster Soltústik Qazaqstan oblysynyń ákimi Ǵaýez Nurmuhambetovten Petropavldyń ataýyn ózgertý týraly suraq qoıdy.
Ákim óńirde oblys ortalyǵyn qaıta ataýdan basqa ózekti máseleler kóp ekenin aıtyp, qysqa qaıyrdy.
«Qazirgi tańda bul másele ózekti dep oılamaımyn. Óıtkeni sheshilýi tıis basqa da máseleler barshylyq. Qalany abattandyrý, jylý, áleýmettik jáne ekonomıkalyq máseleler bar», - dedi ol.
Oblys basshysy ondaı máseleniń qoǵam ishinde talqylanyp júrgeninen habary bar ekenin aıtady.
«Bul taqyryp kóterilip jatqan joq dep joqqa shyǵara almaımyn. Qalanyń ataýyn ózgertý kerek deıtinder bar, áli ýaqyty kelgen joq dep sanaıtyndar da barshylyq. Meniń jeke oıym – adamdardyń pikiri eskerilýi kerek. Kóp adam ózgertý kerek dep sheshse, ony qarastyramyz, – dedi Ǵaýez Nurmuhambetov.
