SQO ákiminiń orynbasary para alǵan áriptesi úshin jumystan ketti

NUR-SULTAN. QazAqparat – Tikeleı baǵynyshtylardyń sybaılas jemqorlyǵy úshin otstavkaǵa ketý týraly normanyń enýine baılanysty 6 saıası qyzmetker tıisti ótinish jazyp, túrli deńgeıdegi 28 basshy tártiptik jaýapkershilikke tartyldy. Bul týraly QazAqparat Antikor silteme jasap habaroaıdy.

Baǵynyshtylardyń sybaılas jemqorlyq quqyq buzýshylyqtary úshin basshylardyń otstavkaǵa ketýi men tártiptik jaýapkershilikke tartý týraly zańnamalyq normanyń oryndalýyna monıtorıng júrgizý jalǵasýda.

«2 qyrkúıekte Soltústik Qazaqstan oblysy ákiminiń orynbasary Fedıaev pen osy oblystyń Aqjar aýdanynyń ákimi Madıarov jumystan bosatyldy», - deıdi Agenttiktiń baspasóz qyzmeti.

Fedıaev sybaılas jemqorlyq qylmysy úshin Memlekettik sáýlet-qurylys baqylaý jáne lıtsenzııalaý basqarmasynyń basshysy Kalabaevqa qatysty sot úkimniń 25 shildede zańdy kúshine enýine baılanysty otstavkaǵa ketý týraly ótinish jazdy.

«Madıarov onyń orynbasary Dosymbekov kináli dep tanylǵannan keıin otstavkaǵa ketti», - dep tolyqtyrdy agenttik.