SQO ákimi jóndelgen joldardyń kepildik merzimin uzartýdy tapsyrdy
PETROPAVL. QazAqparat - Soltústik Qazaqstan oblysynyń ákimdiginde ótken otyrysta aımaq basshysy Qumar Aqsaqalov jol jóndeýshi kompanııalardyń jumysyna kóńili tolmaıtynyn aıtyp, avtojoldardyń kepildik merzimin uzartýdy tapsyrdy, dep habarlaıdy «QazAqparat» HAA tilshisi.
Avtojoldardy kútip ustaý jáne jóndeý jumystarynyń sapasy SQO ákimdiginiń otyrysynda talqylandy.
Aımaq basshysynyń baspasóz qyzmetinen málim etkendeı, sońǵy úsh jylda oblysta 1900 shaqyrym jol jóndeldi. 128 aýyldaǵy joldyń sapasy jaqsardy. Tek bıyldyń ózinde 705 shaqyrym jol jóndelmek.
Degenmen, oblys ákimi Qumar Aqsaqalovtyń keıbir joldardyń sapasyna kóńili tolmady. Osyǵan oraı tıisti organdardyń basshylaryna atqarylatyn jumystarǵa qatań baqylaý júrgizýdi tapsyrdy.
«Áleýmettik jelilerde júk mashınalarynyń tas jolǵa dońǵalaǵymen kirip ketkenin kórsetip jatyr. Barlyq basshylarǵa júk mashınalarynyń qozǵalysyn baqylaýǵa alýdy tapsyramyn. Joldy jóndeý boıynsha da suraqtar bar. Qoǵamdy baqylaýǵa tartyp, kompanııalardyń kepildik merzimin uzartý kerek. Bul, aýlalardy jóndep jatqan merdigerlerge de qatysty», - dedi Qumar Aqsaqalov.
Bıyl «Jańajol» jáne «Qaraqoǵa» baqylaý-ótkizý pýnkterin de qaıta jóndeý jumystary aıaqtalmaq. «Qyzyljar» jáne «Bıdaıyq» beketterin jóndeý josparda bar. Sóıtip, 4 shekara beketindegi jol ınfraqurylymy jaqsarmaq. QR jánk RF azamattaryna shekara arqyly ótý jeńildeı túsedi.
«Biz bıyl eki shekaralyq ótkeldi jóndep bitiremiz. Qarjy bar. Azamattar úshin óte qolaıly bolady. Jol keńeıtilip, baqylaý-ótkizý pýnkteri kóbeımek. Bul, árıne avtomobıl keptelisin azaıtady», - dedi óńir basshysy.
SQO arqyly respýblıkalyq mańyzy bar 1468 shaqyrym jol ótedi. Ony jóndeýge bıyl el qazynasynan 18,8 mlrd teńge bólingen. Byltyr kúrdeli jóndele bastaǵan Petropavl - Qorǵan tas joly da bıyl jalǵasyn taýyp, taǵy 60 shaqyrym jol retke keltirilmek.
