SQO ákimi joldardy jóndeýge beriletin kepildikti 5 jylǵa deıin uzartýdy usyndy
PETROPAVL. QazAqparat – Soltústik Qazaqstan oblysynyń ákimi Qumar Aqsaqalov aıtýynsha, merdigerler jol jóndeý sapasyna kem degende 5 jylǵa kepildik berýi tıis, dep habarlaıdy «QazAqparat» HAA tilshisi.
Aımaq basshysynyń baspasóz qyzmetiniń aqparaty boıynsha, keıbir joldar boıynsha jumystar áli aıaqtalǵan joq. Q. Aqsaqalov mundaı faktiler barynsha azaıtylýy qajet ekenin atap ótti.
«1 jyl kepildik ne bolady? Merdigerler óz jumysyna kem degende 5 jylǵa kepildik berýi tıis. Sonda ǵana olar ony sapaly oryndaýǵa múddeli bolady. Bul aýla ishindegi aýmaqtardy jóndeýge de qatysty», - dep esepteıdi oblys ákimi.
Úsh jyl ishinde óńirde 2 myń km jol jóndeldi. Jumysqa 76 mlrd teńge jumsaldy. 2020 jyly joldardy jóndeý jumysy jalǵasady. Oblys ákimi aýdan ortalyqtaryna jaqsy joldardyń qajet ekenin atap ótti.
«Kelesi jyly biz osy baǵyttaǵy joldardy jóndeýdi bastaımyz. Bul Chkalovo, Rýzaevka, Vozvyshenka, Blagoveşenka jáne basqa da burynǵy aýdan ortalyqtaryna qatysty. Jóndeý jumystary keıbir aýyldarda da bolady. Aýdan ákimderi naqty josparlar usynýy tıis. Soǵan sáıkes biz qarajat bólemiz», - dedi Q.Aqsaqalov.
Eske sala keteıik, osyǵan deıin aımaq basshysy kelesi jyly aýdan ortalyqtarynyń ishinde jóndeý jumystary bastalatynyn aıtqan bolatyn.
