SQO ákimi turǵyndardy sapasyz jóndelgen joldar týraly habarlaýǵa shaqyrdy
PETROPAVL. QazAqparat – Soltústik Qazaqstan oblysynyń ákimi Qumar Aqsaqalov turǵyndardy joldardyń sapaly jasalýyn birge qadaǵalap, qoǵamdyq baqylaýǵa atsalysýǵa shaqyrdy, dep habarlaıdy QazAqparat tilshisi.
SQO ákimi Qumar Aqsaqalov pen «Jol aktıvteri sapasynyń ulttyq ortalyǵynyń» basshysy Zamır Saǵynov jol materıaldarynyń sapasyn tekseretin zerthanaǵa bardy.
Bıyl oblystaǵy joldardy jóndeýge qomaqty soma - 37 mlrd teńge bólindi. Tıisinshe, atqarylyp jatqan jumystarǵa qatań baqylaý qajet. Zerthanalyq baqylaý júıeli túrde júrgizilmek. Buryn bul jumyspen respýblıkalyq joldar ǵana qamtylsa, bıyl oblystyq trassalardyń sapasy da tekseriletin bolady.
Sondaı-aq oblys ákimi turǵyndarǵa úndeý tastady.
«Tehnıkalyq múmkindiktermen qosa, qoǵamdyq baqylaýdy kúsheıtý kerek. Qazir kóbinde gadjetter bar. Joldyń sapasyz salynyp jatqanyn kórseńiz fotoǵa túsirip, qaı jer ekenin aıtý kerek. Jaqynda ǵana salynyp, buzyla bastaǵan joldy kórsetińizder. Barlyq materıaldardy SQO ákimdiginiń saıtyndaǵy «Halyqtyq baqylaý» bólimine joldaý qajet. «Qyzyljar – adaldyq alańyn» da qoldanýǵa bolady. Biz tıisti sharalar qoldanamyz», - dedi Qumar Aqsaqalov.
