SQO ákimi túnde hokkeı oınap júr
PETROPAVL. QazAqparat - Petropavlda alǵash ret Túngi hokkeı lıgasy oıyndary ótkizilip jatyr, dep habarlaıdy «QazAqparat» HAA tilshisi SQO ákimdiginiń baspasóz qyzmetine silteme jasap.
THL-ǵa memlekettik qyzmetkerlerden, bıznesmenderden jáne kásiporyndardyń qyzmetkerlerinen quralǵan áýesqoı komandalar qatysady. «Kórermender naǵyz qyzyqty oıyndardy tamashalaıtynyna senimdimin. Hokkeıshilerge jaqsy oıyn, aıtýly jeńister tileımin», - dedi Qumar Aqsaqalov.
«Qyzyljar» - «Sokol» kezdesýinde aıdyn ıeleri sapynda óńir basshysynyń ózi de óner kórsetti. Jyldam ári sapaly oıyn órnegin kórsetken «Qyzyljar» hokkeıshileri 7-1 esebimen jeńiske jetti, al Qumar Aqsaqalov dýbl avtory atandy.
«Hokkeı oınaýdy mektepte oqyp júrgen kezden bastaǵanmyn. Ol maǵan únemi formada bolyp, kúresýge qaırat beredi. Biz túngi hokkeı lıgasyna kóp ýaqyt daıyndaldyq. Tynymsyz jattyǵý jasadyq. Qarsylastarymyzdyń bári de ózimiz sııaqty áýesqoılar», - dedi SQO ákimi.
Túngi hokkeı lıgasynda 8 komanda jeltoqsannyń ortalaryna deıin kúsh synasady.
