SQO ákimi sý tasqynynan zardap shekkenderge ótemaqy tóleý týraly aıtty
PETROPAVL. QazAqparat - Soltústik Qazaqstan oblysynyń basshysy Qumar Aqsaqalov dúısenbiden beri tótenshe jaǵdaı jarııalanǵan Ǵabıt Músirepov aýdanyna keldi, dep habarlaıdy «QazAqparat» óńir basshysynyń baspasóz qyzmetine silteme jasap.
Rýzaevka aýalynda oblys ákimi sý tasqynynan zardap shekken jergilikti turǵyndarmen kezdesti.
«Eshkim de óziniń problemasymen jalǵyz qalmaıdy. Komıssııa jumys istep jatyr, onyń ókilderi aýyldaǵy árbir úıdi aralap kórdi. Búgin biz keltirilgen shyǵynda esepteýimiz kerek. Ótemaqy tóleý máselesi sheshiledi. Qazir qoǵamdyq uıymdardyń barlyǵynyń esebine qarjy túse bastady, jan-jaqtan kómek kele jatyr. Qysqa merzimde barlyǵyna kómektesemiz jáne ótemaqy tóleımiz»,-dep sendirdi Qumar Aqsaqalov.
«Nur Otan» partııasynyń hatshysy Farhan Qýanǵanov jaǵdaıdy naqty baǵalaý úshin Astanadan arnaıy keldi.
«Biz jaǵdaıdy baqylaýda ustap otyramyz, barlyq máseleler eskeriletin bolady. Sizder úshin oblys pen aýdandardyń basshylyǵy, búkil Qazaqstannyń óńirleri janyn shúberekke túıip otyr»,-dedi Farhad Qýanǵanov.
Oblys ákimi de ótemaqy tóleý máselesi týraly aıtty.
«Biz sizderge qajetti turatyn jer daıyndaımyz jáne aldaǵy bir jarym aı ishinde qarjy máselesin sheship beremiz. Bul rette birshama protsedýralardyń bar ekendigin aıta ketken jón bar. Shyǵyndy naqty esepteýimiz kerek. Qarjyny bólip-bólip emes, birden aýdaramyz. Úıinen aıyrylyp qalǵan turǵyndarǵa baspananyń quny tólenedi, arnaıy komıssııa jumys isteıdi, solar baǵasyn beredi»,-dedi Qumar Aqsaqalov.
Rýzaev turǵyndary tabıǵattyń dúleı kúshimen jáne osy ýaqytta onyń saldarymen kúreste qoldaý kórsetkenderdiń barlyǵyna alǵystaryn bildirdi. Turǵyndarǵa sý tasqyny endi bolmaıtyndyǵyn, úıi aman qalǵandyń baspanalaryna oralyp, maldaryn men dúnıe-múlikterin jetkize berýlerine bolatyndyǵy aıtyldy.
«Biz baǵalaý jumystary júrgizilip bitken soń munda taǵy kelemiz. Bas qosyp, qaıta keńesemiz. Sheshilmeıtin másele joq, eń bastysy úreılenbeý kerek. Bári de durys bolady»,-dedi Qumar Aqsaqalov.
