SQO ákimi sapasyz turǵyn úıdi qabyldaǵandardy jazalamaq
PETROPAVL. QazAqparat - Oblys ákimdiginde «Nurly jer» turǵyn úı qurylysy baǵdarlamasyn iske asyrý máselesi talqylandy, dep habarlady «QazAqparat» HAA tilshisi.
Bıyl óńirde 200 myń sharshy metr turǵyn úıdi tapsyrý josparlanýda. Memlekettik qarjylandyrý esebinen 1559 páter paıdalanýǵa beriledi. Injenerlik-kommýnıkatsııalyq ınfraqurylymdy qamtamasyz etý men aýmaqty abattandyrý, turǵyn úı nysandaryn salýǵa 4,4 mlrd teńge somasynda qarajat kózdeldi.
Qurylys basqarmasynyń basshysy Serik Muhamedıev «Bereke» shaǵyn aýdanynda 96 páterli turǵyn úı paıdalanýǵa ýaqytynda engizilmeýi múmkin ekenin aıtty. Bul úı jergilikti atqarýshy organnan kezekke turǵandarǵa arnalyp salynýda. Paıdalanýǵa engizý 2017 jylǵy jeltoqsanǵa josparlanǵan.
«Qurylys basqarmasy qurylys protsesiniń keshigý sebebin anyqtaý jumystaryn júrgizýde. Negizgisi - qurylys materıaldaryn ýaqtyly jetkizbeý», - dedi Serik Muhamedıev.
Oblys ákimi Qumar Aqsaqalov merzimin keshiktirgen merdigerge qandaı shara qoldanylatynyn surady.
«Qolymyzdy qýsyryp otyra almaımyz. Tapsyrys berýshiniń basshysyna, mınıstrlikke tıisti hat jazý kerek. MSQB baqylaýdy júzege asyryp, jeltoqsanda tapsyrylýy tıis. Sosyn jyldamdatamyz dep sapasy nashar bolyp jatady», - dedi SQO ákimi.
Qumar Aqsaqalov óńirde úılerdi tapsyrý merzimderin buzýdan basqa, sapasyz qurylys jaıynda túsken azamattardyń shaǵymdary da bar ekendigin atap ótti.
«Atap aıtqanda, adamdar shatyr qurylǵysyna shaǵymdanady. Merdigerler bul kemshilikti joıdy, basqa turǵyndardan da shaǵymdar túsip jatyr. Qurylystyń sapasyzdyǵy men onyń tapsyrýǵa tehnıkalyq jáne avtorlyq baqylaý, jergilikti atqarýshy organdar jaýapty bolýy tıis. Jazalanǵandar bar ma? Eger qujattarǵa qol qoıatyndar men sapasyz úıdi qabyldaıtyndardy jazalamasaq, mundaı beıberekettik jalǵasa bermek», - dedi SQO ákimi.
