SQO ákimi Rýzaevka aýylyndaǵy sý tasqynynyń zardaptarymen kúresýge shyqty
PETROPAVL. QazAqparat - Soltústik Qazaqstan oblysynyń ákimi Ǵ.Músirepov aýdany Rýzaevka aýylyndaǵy senbilikke qatysty, dep habarlaıdy «QazAqparat» HAA tilshisi óńir basshysynyń baspasóz qyzmetine silteme jasap.
Óńir basshysy Qumar Aqsaqalovpen birge zardaptardy joıý úshin jáne aýyldy abattandyrý úshin oblystyq máslıhat depýtattary, «Nur Otan» partııasynyń ókilderi, jastar uıymdarynyń belsendileri men Novoıshımskoe aýylynyń turǵyndary qatysty.
Oblys ákimi tabıǵı apattan zardap shekken úılerge baryp, úı ıelerimen áńgimelesti.
«Qýanyshty da, qaıǵyda da bir-birimizge kómektesýimiz kerek. Bizdiń birligimizdiń arqasynda barlyq máselelerdi sheshe alamyz. Arnaıy qurylǵan komıssııa óz jumysyn aıaqtady. Seısenbi kúni málimetterdi alamyz. Ótken joly ýáde etkenimizdeı, bir aı boıy barlyq qajetti kómekti kórsetemiz», - dep ýáde etti Qumar Aqsaqalov.
Ol oblystaǵy jaǵdaıǵa birqalypty dep baǵa berdi. Sergeevskıı sý qoımasyndaǵy sýdyń deńgeıi tómendep jatyr. Shal aqyn jáne Esil aýdandaryndaǵy eldi mekenderdi sý basý qaýpi seıildi. Búgin Qyzyljar aýdany men Petropavl qalasyna sý keledi dep kútilýde. Oblys ákimi, kez kelgen jaǵdaıǵa daıyn ekendikterin jetkizdi.
Aýylǵa úzdiksiz gýmanıtarlyq kómek mashınalary kelip jatyr. Oblystyq máslıhat depýtattary bul joly aýyl turǵyndaryna turmystyq tehnıkalar, azyq-túlik, qurylys materıaldaryn, zattar men keńse taýarlaryn alyp keldi.
