SQO ákimi Petropavldaǵy kóktemgi sý tasqyny saldaryn joıý jaıymen tanysty
ASTANA. QazAqparat - Soltústik Qazaqstan oblysynyń ákimi Erik Sultanov Petropavl qalasy boıynsha jumys sapary kezinde Mamlıýt jolynan 2-shi Zarechnyı kóshesine deıingi joldyń jóndeý jumysymen tanysty, dep habarlaıdy ákimniń baspasóz qyzmeti.
Jumysty «Dorojnık Ashyq Aspan» JShS júrgizgen, quny 53,5 mln teńgeni qurady.
Bul qarajatqa 13,5 myń sharshy metr aýmaqty quraıtyn 2,2 km qashyqtyqqa tóselgen asfaltty-betondy jabyndy qaıta qalpyna keltirildi.
Búginde 2-shi Zarechnyı kóshesinde, «Zarechnyı» kentine sý torabynan kireberis jolǵa ortasha deńgeıdegi jóndeý jumystary júrgizilýde.
Jergilikti turǵyndar, sondaı-aq «Iskra» jáne «Vesna» saıajaı birlestikteriniń ókilderi óńir basshysyna júrgizilgen jumys úshin alǵystaryn bildirdi.
«Sizge bizdiń aýmaqqa abbatandyrý, jóndeý jumystaryn júrgizgeni úshin alǵysymdy bildiremin. Osy jumystardy júrgizýge atsalysqan barlyq adamdarǵa úlken raqmet. Biz óte qýanyshtymyz. Barlyǵy ádemi, yńǵaıly jasalǵan, endi bul jolmen júrý bir ǵanıbet», - dedi «Vesna» saıajaı birlestiginiń tóraǵasy Vıktor Halın.
Óz kezeginde Erik Sultanov jergilikti turǵyndarmen áńgimelesý barysynda tasqyn saldaryn joıý jumystary qalanyń ózge de aýdandarynda jalǵasatynyn atap ótti.
«Úkimet rezervinen 1 mıllıard 300 mıllıon teńge bólindi. Osy qarajatqa Teri zaýyty shaǵyn aýdanynda sý deńgeıiniń kóterilýin boldyrmaý úshin sýdan qorǵaıtyn bógetti qaıta salý jumystaryn júrgizý josparlanǵan», - dep atap ótti Erik Sultanov.
Tasymaldaýshylardyń atynan «SQO Avtokólik odaǵy» qaýymdastyǵynyń tóraǵasy Galına Semenova óńir basshysyna alǵysyn jetkizdi: «Qala boıynsha búginde kóptegen joldar jóndeldi. Biz, tasymaldaýshylar, ony baıqap júrmiz. Óıtkeni bizdiń kólik quraldarymyzdyń túgeldigi men amandyǵy jol sapasyna baılanysty».
Joldardyń jaı-kúıimen tanysqan soń Erik Sultanov merdiger uıymnyń basshysyna aýyl turǵyndaryna yńǵaıly bolý úshin jaıaýjoldyń eni 2 metrden kem bolmaýyn tapsyrdy.
Budan bólek, Zarechnyı kentinde «Kommýnshar-Petropavl» JShS apatty jaǵdaıda turǵan aǵashtardy kesý, aqtaý, sıretý, sondaı-aq aýyl kóshelerin tazartý, shópterdi shabý, kópirdi boıaý jumystaryn júrgizgen. Sondaı-aq, «Dorsıgnal» kásiporynynyń qyzmetkerleri jol belgilerin qalpyna keltirgen. Abattandyrý jumystary aıaldamalarda da júrgizilgen. Ondaǵy avtobýs nómiri men júrý ýaqytynyń qashyqtyǵy kórsetilgen kesteler qaıta jańartylǵan.
