SQO ákimi Petropavlda páterdiń qymbattyǵyna óz pikirin bildirdi
PETROPAVL. QazAqparat – Soltústik Qazaqstan oblysynyń ákimi Qumar Aqsaqalov eseptik kezdesýinde Petropavldaǵy páterdiń qymbattyǵyna qatysty óz pikirin bildirdi, - dep habarlaıdy QazAqparat tilshisi.
Petropavlda páterdiń negizsiz qymbattyǵy áleýmettik jelide jıi talqylanady. SQO ákimi Qumar Aqsaqalovtyń aıtýynsha, baspananyń qymbattaýyna birneshe faktor áser etedi.
«Oblys ortalyǵynda buryn turǵyn úı az salyndy. Tek sońǵy 3 jylda ǵana qurylys qyzǵan. Al suranys bar. Keıbireýler buǵan ákimdikti kinálaıdy. Úıleri syrylǵan qalalyqtarǵa páter satyp alýdan, baǵa ósip ketti dep oılaıdy. Biz muny tekserdik. Byltyr Petropavlda baspana satyp alýǵa qatysty 11 797 kelisim jasalsa, sonyń 285-i ǵana qala ákimdigine tıesili. Bul barlyq jasalǵan mámileniń tek 2,4 % ǵana. Al bul jyljymaıtyn múlik naryǵyna áser etpeıdi. Sondyqtan baǵany negizsiz kóterip, alyp-satarlyqpen aınalysýǵa bolmaıdy», - dedi Qumar Aqsaqalov. .
Petropavlda baspana qymbattamaýy úshin turǵyn úıdi kóptep salyp, bul jumystardy júrgizýge qurylys kompanııalary shaqyrylmaq.
«Biz bolashaqty oılaýymyz kerek. Sol sebepti qazir elimizderi iri qurylys kompanııalarynyń biri – «Bazıs A»-men kelissózder júrgizilip jatyr. Delegatsııa kelip ketti, biz josparlarymyzben bólistik. Kompanııa basshylyǵy tarapynan kommertsııalyq baspana salýda qyzyǵýshylyq bar», - dedi SQO ákimi Qumar Aqsaqalov.
