SQO ákimi pedıkýlezdiń órshýin monsha tapshylyǵynan kórip otyr
PETROPAVL. QazAqparat - Soltústik Qazaqstan oblysy týberkýlez aýrýynyń taralýy boıynsha el óńirleri arasynda ekinshi orynda tur. Sondaı-aq aımaqta pedıkýlez ben ótkir ishek ınfektsııalaryn juqtyrý kórsetkishi artqan, dep habarlaıdy QazAqparat tilshisi.
SQO ákimdiginiń otyrysynda óńirdiń sanıtarlyq epıdemıologııalyq jaǵdaıy talqylandy.
Mamandardyń aıtýynsha, oblystaǵy epıdemıologııalyq ahýal jalpy alǵanda, jaman emes. Júrgizilgen keshendi sharalar ınfektsııalyq aýrýlardyń taralýyn turaqtandyrýǵa kómektesti. Byltyr eseptegi 99 túrli ınfektsııalyq jáne parazıttik aýrýlardyń 48-i boıynsha birde-bir jaǵdaı tirkelmedi.
«Kóptegen ınfektsııalar boıynsha kórsetkish tómendedi: bakterıaldy dızenterııa - 2,8 ese, tumaý - 32,8%, enterobıoz - 16,4%, dermatomıkozdar - 18,5%. Alaıda, ótkir ishek ınfektsııalary 38% artqan. 2017 jyly - 372 adam, byltyr 505-i aýyrǵan. Kene entsefalıtine shaldyǵý 3 jaǵdaıǵa kóp», - deıdi SQO Qoǵamdyq densaýlyq saqtaý departamentiniń bastyǵy Serikbaı Qasmaqasov.
Onyń málimetinshe, oblysta pedıkýlez máselesi sheshiler emes. Mamannyń pikirinshe, oǵan qoǵamdyq monshalardyń jetkiliksizdigi sebep bolýy múmkin. Óńir boıynsha qazir monshalar men saýnalardyń sany 101 ǵana. Jambyl, Mamlıýt, Ýálıhanov jáne Esil aýdandarynda múlde qoǵamdyq monsha joq. Oblys ákimi Qumar Aqsaqalov aýdan ákimderine bul máseleni sheshýdi tapsyrdy.
SQO-da týberkýlezben aýyrý 4,5% azaıǵanymen, respýblıkalyq kórsetkish boıynsha onyń 22,7% artqany baıqalady. Mamandardyń aıtýynsha, dertti alǵash juqtyrǵandardyń 54% esh jerde jumys istemeıtinder.
