SQO ákimi nannyń baǵasyn qadaǵalaýdy tapsyrdy
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov nannyń baǵasyn qadaǵalaýdy tapsyrdy, dep habarlaıdy QazAqparat tilshisi.
Óńir basshysy bul máseleni ákimdik otyrysynda kóterdi. Ótken aptada áleýmettik jeli qoldanýshylary nan ónimderi baǵasynyń kóterilgenin belsendi talqylady. Oblys ákimdiginde nan baǵasynyń ózgerissiz qalǵanyn atap ótti. Oblys ákiminiń orynbasary Dáýren Jandarbek atap ótkendeı, óńirdegi basty nan óndirýshisi - Petropavl nan ónimderi kombınaty salmaǵy 500 gramdyq «Gorodskoı» bólkesin shyǵaryp jatyr. Kásiporyn aı saıyn 45 myń bólke shyǵarady. Onyń baǵasy 65-70 teńge.
«Nannyń 50% astamy birinshi jáne joǵarǵy surypty unnan pisiriletin «Osobyı» dep atalatyn nan. Bizdiń maqsatymyz - nannyń baǵasyn kótermeý. Osyny júzege asyrý úshin qoldan kelgenniń bárin jasap jatyrmyz», - dedi Q.Aqsaqalov.
Q.Aqsaqalov aýdandarda nan baǵasynyń qaladaǵydan joǵary bolmaýy tıis ekenin basyp aıtty.
«Nan baǵasy qatań baqylaýda bolýy tıis. Basqa azyq-túlik túrleri baqylaýǵa alynbaıdy, sebebi, bul - naryq. Halyqtyń jappaı tutynatyn ónimderiniń baǵasy turaqty bolady», - dedi Q,Aqsaqalov.
Olesıa Jýkoven
