SQO ákimi: Muǵalimderden aqsha jınaǵan basshylar jumystan qýylady
SQO ákimi Qumar Aqsaqalov búgin qala mektepterin aralap, olarda júrgizilip jatqan kúrdeli jóndeý jumystaryn qadaǵalady.
Oblys ákimi baspasóz qyzmetiniń habarlaýynsha, óńir basshysy mektepterdi aralaý kezinde muǵalimder men ata-analardan zańsyz aqsha jınaǵan basshylardy qatań jaza kútetinin eskertken.
«Bizge muǵalimderden synypty jóndeýge aqsha jınap jatyr degen aqparat túsýde. Bul bassyzdyq. Biz bıýdjetten qajetti qarajat bóldik. Ol aqsha jetkilikti. Muǵalimder men ata-analardan birde-bir tıyn jınalmasyn. Eger osyndaı faktiler tirkelse, basshylardy jazalaımyz, tipti ornyn bosatady. Mektep dırektorlary men aýdandyq bilim basshylaryna aıtyp jatyrmyn. Bilim basqarmasy oblys boıynsha baqylasyn. Eger faktiler bolsa, maǵan Feısbýk pen Instagramǵa jazyńyzdar, tekseremiz», - dedi Qumar Aqsaqalov.
Aıta keteıik, bıyl oblysta 120 mektepti kúrdeli jóndeýden ótkizýge 5 mlrd teńge bólindi. Byltyrǵy jyldarmen salystyrǵanda qarajat 12 ese ósti.