SQO ákimi mekteptegi shabýyldan zardap shekken balalardyń kóńilin surap bardy

PETROPAVL. QazAqparat – Soltústik Qazaqstan oblysynyń ákimi Aıdarbek Saparov kópbeıindi balalar aýrýhanasyna baryp, búgin 9-synyp oqýshysynyń qolynan jaraqat alǵan balalardyń hal-jaǵdaıyn bildi, dep habarlaıdy QazAqparat tilshisi.

SQO ákimi Aıdarbek Saparov oblystyq kópbeıindi balalar aýrýhanasynda boldy. Óńir basshysy otadan keıin esterin jınaǵan eki balamen tildesti. Bul jaıynda ol áleýmettik jelidegi paraqshasynda jazdy.

«Búgingi oqıǵadan keıin aýrýhanaǵa túsken balalardyń hal-jaǵdaıyn bildim. Balalarmen tildesip, tezirek saýyǵyp ketýin tiledim. Zardap shekkenderge qajetti kómek kórsetildi, qazir olardyń jaǵdaıy turaqty. Balalar dárigerlerdiń baqylaýynda», - dedi Aıdarbek Saparov.

Búgin tańerteń Petropavldaǵy №4 orta mekteptiń 9-synyp oqýshysy sabaqqa ózimen birge balta men pyshaq ala kelip, joǵary synyptyń úsh balasyn jaraqattaǵan edi.

Mektepke qarýlanyp kelip, qatarlastaryna shabýyldaǵan jasóspirim, keıin belgili bolǵandaı, psıhıatrııalyq esepte turǵan.

Zardap shekken balalardyń ekeýine ota jasalyp, olar jansaqtaý bólimine jatqyzyldy. Úshinshisi qajetti kómek alǵannan keıin úıine jiberildi.

SQO ákimi oqıǵany baqylaýda ustap otyr. Aıdarbek Saparov istiń mán-jaıyn tolyq anyqtaý úshin arnaıy komıssııa qurylǵanyn aıtty.

Foto: facebook.com/people/Aıdarbek-Saparov