SQO ákimi qurylys barysymen tanysty
PETROPAVL. QazAqparat - Jaz maýsymy qurylys jumystary qarqyndy júrgiziletin kezeń. Búginde óńirimizde, ásirese, oblys ortalyǵynda turǵyn úıler men áleýmettik nysandar kóptep salynýda. Óńir basshysy Erik Sultanov ótken senbi kúni birqatar qurylys nysandaryn aralap kórdi, dep jazady "Soltústik Qazaqstan" gazeti.
Aldymen oblys ákimi Qyzyljar aýdanyna qarasty Báıterek aýylynda salynyp jatqan 300 oryndyq jańa mekteptiń qurylysynda boldy. Búginde munda jumystyń deni oryndalǵan. Áıtse de, jańa oqý jylynda mektepti paıdalanýǵa berý úshin qurylysshylarǵa shıraq jumys isteý kerek ekenin aıtqan Erik Hamzauly ınjenerlik-kommýnıkatsııalyq jeli tartýǵa nazar aýdardy. Ústimizdegi jyldyń basynda qurylys jumystaryn qolǵa alǵan merdiger kompanııa "Sevımstalkon" JShS bıyl jańa bilim oshaǵy oqýshylarǵa esigin aıqara ashatynyna sendirdi. Qazirgi tańda tóbesi jabylyp, ishki árleý jumystary júrgizilýde. Jumystyń 80 paıyzy oryndalǵany týraly ýchaske basshysy Bógenbaı Musylmanbekov jýrnalısterge bergen suhbatynda aıtyp ótti.
Óńir basshysy kelesi atbasyn tiregen nysan Petropavl halyqaralyq áýejaıy boldy. Qazir munda áýejaı termınalyn jóndeý boıynsha jumys erekshe qarqyn alǵan. Sonymen qatar, ǵımarattyń qasbetin qalpyna keltirý, ishki jumystar jáne alańdy abattandyrý jumystary da qat-qabat júrgizilýde. Osy oraıda oblys ákimi áýejaı termınalyn jóndeý boıynsha qurylǵan shtabtyń ókilderimen keńes ótkizip, aldaǵy kúnderdiń aýqymdy josparlaryn talqylady.
Oblys ortalyǵynda Jastar saraıyna (burynǵy "Metro" oıyn-saýyq ortalyǵy) jóndeý jumystarynyń júrgizilýi de qýanyshty jaǵdaı. Byltyr kontsert, sport zaldary men shatyry, qyzmettik kabınetter jóndeýden ótkizilgen. Alystan menmundalap, kórkimen kóz tartar ǵımarattyń syrtqy kelbeti bıyl dekoratıvti materıaldarmen árlengen. Búginde ǵımarat aldy jóndelýde. Aldaǵy ýaqytta oryndyqtar qoıylyp, qoqys jáshikteri ornatylmaq.
Baspana salý máselesi de únemi nazarda. Qazirgi tańda oblys ortalyǵyndaǵy "Bereke" shaǵynaýdanynda birneshe turǵyn úı salynýda. Qurylys jumystarymen jiti tanysqan óńir basshysy úılerdiń sapaly salynýy men ýaqytynda paıdalanýǵa berilýi kerektigin eskertti. Jalpy, bıyl oblys boıynsha 1011 páterlik 11 turǵyn úı qoldanysqa berilmek.
"Bereke" shaǵynaýdanynda taǵy bir berekeli is qolǵa alynýda. Pravoslav dinin ustanýshylar úshin úsh júz oryndyq Sevastıan-Magdalınskıı shirkeýi salynýda. Qazir jumystyń 25 paıyzy oryndaldy. Ústimizdegi jyldyń maýsym aıynda irgetasy qalanǵan ǵıbadathana 2018 jyly paıdalanýǵa beriledi dep kútilýde. Jalpy aýmaǵy bir myń sharshy metrden astam nysan qurylysyna 350 mıllıon teńge jumsalmaq. Demeýshiler tarapynan qarjy quıylyp jatyr. Musylman qaýymy úshin de jaǵymdy jańalyq 20-shy shaǵynaýdanda qurylysy qolǵa alynǵan 500 oryndyq jańa meshit der edik. Meshittiń baǵanalary men jaqtaýlaryn ornatý úshin taǵy bir kompanııa qurylysqa tartylýda.
Sondaı-aq, óńir basshysy "RımKazAgro" JShS-niń jyldam pisetin kespelerdi, botqalardy, sorpalardy, kartop ezbesin daıyndaıtyn tsehynda boldy. 2016-2019 jyldardaǵy kásipkerlikti qoldaý kartasyna engizilgen joba aıasynda 58 jumys orny ashylady.
Oblys ákimi Erik Sultanov jumys sapary barysynda "SevKazEnergo" AQ-nyń bastamasymen qolǵa alynǵan Jambyl-Ǵabıt Músirepov kósheleriniń qıylysyndaǵy jataqhananyń qurylysymen tanysty. Ústimizdegi jyldyń jeltoqsan aıynda atalmysh kompanııa qyzmetkerleriniń ıgiligi úshin paıdalanýǵa berý josparlanyp otyrǵan jataqhananyń jalpy aýdany 4329 sharshy metr.
- Jeltoqsan aıynda birqatar merekelik sharalar atalyp ótiledi. Ásirese, elimiz úshin eleýli oqıǵa - Táýelsizdiktiń 25 jyldyǵyna oraı qyzmetkerlerdi baspanamen qamtamasyz etý ıgi is bolar edi, - dep atap ótken Erik Hamzauly qolǵa alynǵan bastamaǵa kóńili tolatynyn jetkizdi. 1993 jyly salynǵan ǵımarat buǵan deıin bos turǵan bolatyn. Búginde jataqhana retinde qaıta qalpyna keltirilýde.
- Bul nysandy biz 2015 jyly satyp alǵan bolatynbyz. Shaǵyn otbasylarǵa arnalǵan jataqhanada qyzmetkerlerimiz turatyn bolady jáne bólmelerdiń birqataryn Petropavl qalasynyń az qamtylǵan otbasylaryna berý qarastyrylǵan. Jalpy sany 90 páterdiń beseýi - eki bólmeli, qalǵany bir bólmeli bolady, - dedi "SevKazEnergo" AQ bas dırektorynyń orynbasary Alla ıAzovskaıa.
