SQO ákimi Qumar Aqsaqalov Samal Eslıamovanyń týystaryn quttyqtady
PETROPAVL. QazAqparat - Soltústik Qazaqstan oblysynyń ákimi Qumar Aqsaqalov Samal Eslıamovanyń týystaryn quttyqtap, aktrısaǵa quttyqtaý jedelhatyn joldady, dep habarlaıdy QazAqparat tilshisi.
Óńirlik kommýnıkatsııalar qyzmetiniń habarlaýynsha, oblys ákimi quttyqtaýynda Samal Eslıamova búkil respýblıkamen qosa Soltústik Qazaqstan oblysynyń da abyroıyn asyrǵanyn aıtqan.
«Óz atymnan jáne búkil soltústikqazaqstandyqtardyń atynan Sizderdi jáne Samaldy osynaý mańyzdy jeńisimen quttyqtaımyn! Jerlesimizdiń tamasha somdaǵan róli álemdegi eń bedeldi kınofestıvaldardyń biriniń qazylar alqasyn tamsandyrdy. Samal qut daryǵan Soltústik Qazaqstan jerinde shyǵarmashylyq ıesi retinde ósip-óndi. Ol osynda týyp-ósti, tárbıelendi, mektepte, óner kolledjinde oqydy, teatrda oınady», - dedi Qumar Aqsaqalov.
Óńir basshysy búgin otandyq kınoındýstrııa joǵary qarqynmen damyp kele jatqanyn tilge tıek etip, bul rette Samal syndy talant ıeleriniń eńbegi mol ekenin aıtty.
Eske sala keteıik, reseılik rejısser Sergeı Dvortsevoıdyń «Aıka» atty kartınasynda basty róldi somdaǵan qazaqstandyq aktrısa Samal Eslıamova 71-shi Kann kınofestıvalinde óz atalymy boıynsha úzdik dep tanylǵan bolatyn.
