SQO ákimi kóktemgi sý tasqynynyń aldyn alý jumystaryn ýaqtyly oryndaýdy tapsyrdy
ASTANA. QazAqparat - Soltústik Qazaqstan oblysynyń ákimi Erik Sultanovtyń tóraǵalyǵymen ótken apparattyq keńeste oblystyń jylý magıstraldaryndaǵy jáne sý ótkizý qubyrlaryndaǵy apattardy aldyn alý men joıý jumystary, sondaı-aq, jylytý maýsymy men Petropavl qalasynyń kóshelerin tazartý jumystary talqylandy. Bul týraly SQO ákimdiginiń baspasóz qyzmetinen habarlady.
Birinshi másele boıynsha energetıka jáne turǵyn úı kommýnaldyq sharýashylyq basqarmasynyń basshysy Tasmurat Qatqadamov baıandady.
Mekeme basshysynyń aqparaty boıynsha jyl saıyn magıstraldi jylý jelilerindegi apattar sany tómendep kele jatyr.
«2014 jyly II dárejeli tehnologııalyq buzýshylyqtar 92 bolsa, 2015 jyly 93, al 2016 jyly bul kórsetkish 88 bolǵan. Osy kezeń ishinde I dárejejegi apattar bolmaǵan. Bıylǵy jylý maýsymynda bolǵan tehnologııalyq apat - jylý magıstraldarynyń korrozııalyq tozýy», - dedi Tasmurat Qatqadamov.
Jylý jelileriniń tozýyn túbegeıli sheshý úshin kúrdeli jóndeý, qaıta qurý men jelilerdiń tozǵan ýchaskelerin aýystyrý sharalary qoldanylyp jatyr. 2016 jyly «Petropavl jylý jelileri» JShS-gi 412 mln. teńgege 14,7 shaqyrym jylý jelilerine kúrdeli jóndeý, 11 shaqyrym jalańash qubyrlaryna jylylyqty ótkizbeý jumystary jasaldy. Investıtsııalyq tarıf smetasy aıasynda 355 mln. teńgege TM №5 qubyrynyń 1,053 shaqyrymyna qaıta qurý jumystary júrgizildi. Halyqaralyq Qaıta qurý jáne Damý bankinen alǵan qaryz ben QR Ulttyq ekonomıka mınıstrliginiń bıýdjettik qarjylandyrý arqasynda bul kásiporyn 1 mlrd. 84 mln. teńgege TM №5 qubyrynyń 1,6 shaqyrymyna, 415 mln. teńgege TM №2 qubyrynyń 0,972 shaqyrymyna qaıta qurý jumystary júrgizildi.
«2017 jyly 407 mln. teńgege 12,6 shaqyrym kúrdeli jáne 4 shaqyrym jylý jelilerine jylylyqty ótkizbeý boıynsha jóndeý jumystary júrgiziledi. Investıtsııalyq baǵdarlama aıasynda454 mln. teńgege 1,12 shaqyrym jylý jelilerin aýystyrý josparlanǵan. Halyqaralyq Qaıta qurý jáne Damý bankinen alǵan qaryz ben QR Ulttyq ekonomıka mınıstrliginiń bıýdjettik qarjylandyrý arqasynda 6,3 shaqyrym jylý jelisin qaıta qurý josparlanǵan. Aldaǵy ýaqytta jylý jelilerin qaıta jańǵyrtý jumystary 2020 jylyna tozýdy 71,8%-dan 62%-ǵa tómendetýge múmkindik beredi», - dedi basqarma basshysy.
Jelilerdi qaıta qurý men aýystyrý jumystary jalǵasatyn bolady. Qaıta bekitilgen ınvestıtsııalyq baǵdarlama boıynsha «Qyzyljar sý» JShS-gi 42,5 shaqyrym sý jelilerin jańartpaq, bul jelilerdiń tozýyn 72%-dan 60%-ǵa deıin tómendetedi.
Oblys ákimi Erik Sultanov Petropavl jáne aýdandardyń basshylyǵyna ınjenerlik kommýnıkatsııalar baqylaýda ustap, qalpyna keltirý jumystaryn ýaqtyly ótkizýdi tapsyrdy.
Ekinshi másele boıynsha Petropavl qalasynyń ákimi Marat Tasmaǵanbetov sóz sóıledi.
«Jylytý maýsymy shtatty tártipte ótip jatyr. Tutynýshylardyń elektr jáne jylý energııasyna degen suranystary tolyǵymen qanaǵattandyrylýda. JEO-2 jeltoqsan aıynda 6,5 mlrd. teńge turatyn №5 týrboagregaty men 3,1 mlrd. teńge turatyn № 12 týrboagregatty qaıta jańǵyrtý jumystarynan keıin iske qosyldy. Bul belgilengen elektr qýatyn 541 MVtqa, jylý qýatyn saǵatyna 713 gıgakallorııaǵa arttyrýǵa múmkindik berdi. Jabdyqtardyń tozýy 10,2 %-ǵa tómendedi», -dedi Petropavl qalasynyń ákimi.
Qys kezinde qala kóshelerin tazalaýǵa 11 kásiporyn jumyldyrylǵan. Kóshelerdi tazalaý jumystary 23.00-den 05.00-ge deıin júrgiziledi. Kúnine baǵyttarǵa 40 birlik tehnıka shyǵady.
Joldyń júretin bóligin kóktaıǵaqqa qarsy materıaldarmen óńdeý jumystaryn 4 kásiporyn atqarady.Bul kásiporyndar 6 myń tekshe metr qum men tuz aralasqan qospany daıyndady. 2016 jyldyń 19 qazanynan bastap qospanyń 2,8 myń tekshe metri qoldanylǵan. Joldyń júretin bóligin kóktaıǵaqqa qarsy materıaldarmen óńdeý jumystary tańǵy 05.00-den 07.30-ǵa deıin júrgiziledi.
Óńir basshysy Erik Sultanov kóktemgi sý tasqyny kezeńine daıyndyq barysynda qardy shyǵarý jumystaryn ýaqtyly oryndaýdy tapsyrdy.
