SQO ákimi kókónis ósirý týraly: Mıllıondap tabys tabýǵa bolady
PETROPAVL. QazAqparat - Soltústik Qazaqstanda ózin-ózi jumyspen qamtamasyz etkender jáne jumyssyzdardy qosymsha eńbekpen qamtý aıasynda azamattar kókónis, ara, mal jáne qus sharýashylyqtaryna tartylýda. Jambyl aýdanyna jumys sapary barysynda oblys ákimi Qumar Aqsaqalov atalmysh baǵdarlamaǵa tartylǵan aýyl turǵyndarymen kezdesti. Bul týraly QazAqparat ákimniń saıtyna silteme jasap habarlaıdy.
Jambyl aýdanynyń turǵyny Nıkolaı Volkov bıyl kókónis sharýashylyǵyn damytýdy qolǵa alypty. Aýyldyqqa kartop ósirýge 94 gektar jer berilipti. Bıyl 12 gektarǵa kartop egildi, kelesi jyly bul kórsetkishti 60 gektarǵa jetkizýdi kózdep otyr.
«Qazir bizde 5 adam jumys isteıdi. Bul otbasylyq bıznes. Maýsymdyq jumystarǵa 10 turǵyndy tartyp otyrmyz», - dedi Nıkolaı Volkov.
Jas kásipker kúzde jaqsy ónim alýdy kózdep otyr, shamamen 180-200 tonna. Óńir basshysy Qumar Aqsaqalov soltústik aımaqta kókónis sharýashylyǵy joǵary tabysty bıznes ekendigin atap ótti.
«Bizdiń klımat jaǵdaıynda kókónis sharýashylyǵy jaqsy nátıjeler beredi. Sý resýrstaryn jáne jerdi ońtaıly paıdalanýdyń arqasynda ár gektarynan 5,5 mıllıon teńgege deıin tabys tabýǵa bolady», - deıdi Qumar Aqsaqalov.
Jalpy, oblys boıynsha bıyl 35 myń gektarǵa kartop sebildi. Byltyrǵy jylmen salystyrǵanda kartop alqaptary 7 myń gektarǵa kóbeıdi.
