SQO ákimi kásiporynda mert bolǵan 4 jumysshynyń otbasyna barynsha kómek kórsetýdi tapsyrdy

PETROPAVL. QazAqparat – Soltústik Qazaqstan oblysy Taıynsha aýdanyndaǵy shoshqa kesheninde qaza tapqan tórt jumysshynyń otbasyna barynsha kómek kórsetiledi. Óńir basshysy Aıdarbek Saparov jedel keńes ótkizip, bar shyǵyndy kompanııa kóteretinin aıtty, dep habarlaıdy QazAqparat tilshisi.

SQO Taıynsha aýdany Novoıvanovka eldi mekeninde ornalasqan «EMS AGRO» JShS shoshqa kesheninde tereńdigi 8 metrlik kárizdik jınaqtaýshyny tazalaý barysynda 4 jumysshynyń mert bolǵanyn aıtqan edik.

Olardyń deneleri sot-medıtsınalyq saraptamaǵa jiberildi. Er adamdar gazdan ýlanýy múmkin.

SQO ákimi Aıdarbek Saparov Taıynsha aýdanynda osy oqıǵaǵa qatysty jedel keńes ótkizdi.

Arnaıy komıssııa quryldy. Polıtsııa departamenti men prokýratýra óz jumysyn atqarady. Túnde oqıǵa ornyna bárimiz keldik, kórdik. Qaza tapqandardyń týǵan-týystarymen kezdestik. Jerleý rásimin aýdandyq ákimdik pen kompanııa ótkeredi. Barlyq shyǵyndy kásiporyn kóteredi. Sondaı-aq, otbasylaryna da kómektesedi. Nesıeleri bolsa ony da sheshý kerek

, - dedi SQO ákimi Aıdarbek Saparov.

Osy oqıǵaǵa qatysty oblystyń memlekettik eńbek ınspektorynyń basshylyǵymen arnaıy komıssııa quryldy. Bul týraly Eńbek jáne halyqty áleýmettik qorǵaý mınıstrliginiń baspasóz qyzmeti habarlady. Jazataıym oqıǵanyń sebebi men mán-jaıy anyqtalǵannan keıin qosymsha habarlanbaq.