SQO ákimi kásipkerlerdi aqshasyz tólemder júıesin engizýge shaqyrdy
PETROPAVL. QazAqparat - Soltústik Qazaqstan oblysynyń ákimi Qumar Aqsaqalovtyń bıznes-qaýymdastyq ókilderimen beıresmı kezdesýinde kásipkerlik salasyndaǵy mańyzdy máseleler qozǵaldy, dep habarlaıdy QazAqparat tilshisi.
Óńir basshysy baspasóz qyzmetiniń habarlaýynsha, kásipkerlerdiń 40% saýdamen, 20% aýyl sharýashylyǵymen aınalysady. Tek 4% ǵana ózin óndiriste tapqan. Qazirgi mindet - halyq tutynatyn taýarlar men azyq-túlik túrlerin barynsha óńirde óndirý. Bul maqsatta memleket tarapynan kóptegen jeńildetilgen nesıe berilýde. Alaıda, oblysta bıznesmenderdiń belsendiligi tómen.
«Qazaqstanda jeńildetilgen nesıe baǵdarlamasyna 600 mlrd teńge bólindi. Oblysta bar bolǵany 500 mln teńgeniń 4 jobasy ǵana maquldandy. Bul tym az. Sharttary kóńilge qonymdy. Paıyzdyq mólsherleme 8-den 6% deıin tústi. Basymdyq beriletin salalardyń tizimi 108-ge deıin artty. Kásipkerlerdi osy múmkindikti paıdalanýǵa shaqyramyn», - dedi Qumar Aqsaqalov.
Oblys ákimi «kóleńkeli ekonomıkamen kúres te basym baǵyttardyń biri» deıdi. Aqshalaı tólemderdiń qysqarýy kóleńkeli bıznes pen jemqorlyqtyń azaıýyna tikeleı áser etedi.
«Bizde 5,6 myń saýda orny bar, onda bar bolǵany 1,5 myńynda ǵana post-termınal bar. Óńirde aı saıyn kartaǵa 27 mlrd teńge aqsha tússe, onyń 22 mlrd teńgesi aqshalaı túrde alynady. Tek 16 paıyzy ǵana aqshasyz tólemderdi qurap otyr. Osy aıyrmashylyqty qysqartý úshin barlyq jerde aqshasyz tólem júıesin engizý kerek», - dedi óńir basshysy.
Eki jarym saǵatqa sozylǵan kezdesý barysynda Qumar Aqsaqalov kásipkerlerdiń qoıǵan suraqtaryna jaýap berdi, usynystaryn tyńdady. Sondaı-aq bıznes-qaýymdastyq ókilderin belsendi bolyp, oblystyń damýyna baǵyttalǵan jobalardy júzege asyrýǵa shaqyrdy. Sáıkesinshe jergilikti bılik tarapynan kásipkerlerge barynsha qoldaý kórsetilmek. 
